Hər hansı futbolçunun xarici klubda çıxış etməsi yaxşı haldır. Bu, ölkənin adını tanıtmaqla yanaşı, futbolçunun öz təcrübəsini və potensialını artırması baxımından vacibdir. Bu mənada milli yığma komandamızın üzvləri Vaqif Cavadov və Mahir Şükürovun xarici klublardan dəvət alması təqdirolunası faktdır.
Hələ ötən saylarımızın birində qeyd etmişdik ki, Azərbaycan futbolçularını yaxın zamanlarda Rusiya, Ukrayna və Türkiyə çempionatlarında görə bilərik. Bu istiqamətdə artıq ilk faktlar var. Milli yığma komandamızın aparıcı futbolçusu, Ağdamın "Qarabağ" klubunun hücumçusu Vaqif Cavadov Hollandiyanın "Tvente" klubu ilə müqavilə bağlamaq ərəfəsindədir. Rusiya və Hollandiya klublarından təklif alan futbolçu sonda üstünlüyü "Zanbaqlar ölkəsi"nə verib.
Vaqif Cavadovun "Tvente"yə keçidi Azərbaycan futbolu üçün vacib hadisə olacaq. Əvvəla ona görə ki, indiyə kimi heç bir azərbaycanlıya futbol ölkəsi kimi tanınan Hollandiya klubunda çıxış etmək nəsib olmayıb. Bundan başqa, indiyə kimi xarici klublarda çıxış etmiş həmvətənlərimiz arasında Nazim Süleymanov yeganə futbolçudur ki, təmsil etdiyi klubla ölkə çempionu adını qazanıb. Odur ki, Vaqif Cavadovun "Tvente"nin heyətində Hollandiya çempionu titulunu qazanmaq şansı var. Çünki Vaqifin müqavilə imzalamağa hazırlaşdığı "Tvente" indiyə kimi iki dəfə Hollandiya çempionatında gümüş medala sahib olub. Baş məşqçi Stiv Maklaren isə bu dəfə komandasına qızıl medalları qazandırmaq niyyətindədir.
Yeri gəlmişkən, "Tvente"nin heyətində möhkəmlənmək 20 yaşlı Vaqif üçün asan olmayacaq. Vaqif hücum xəttində kifayət qədər səviyyəli futbolçularla rəqabət aparmalı olacaq. "Tvente"nin hücum xətti yalnız "Ayaks" və "PSV Eyndhoven" kimi Avropanın məşhur klublarından geri qalır. Komanda Hollandiya çempionatının birinci dövrəsində bir dəfə də olsun uduzmayıb. Stiv Maklaren də yaxşı anlayır ki, həm daxili çempinatda, həm də Avropa Liqasında uğurla çıxış etmək üçün kifayət qədər ehtiyat oyunçuya malik olmalıdır.
Tərəflərin razılaşmasına əsasən, bazar günü Vaqif Cavadovla 3 illik müqavilə imzalanmalıdır. Müqavilə imzalandıqdan sonra "Tvente" həmyerlimizi ictimaiyyətə təqdim edəcək və Azərbaycanda ilin futbolçusu seçilən Vaqifi heyətinə götürəcək.
Qeyd edək ki, Cavadov 3 ildir çıxış etdiyi "Qarabağ"ın Avropa Liqasında "Tvente"yə qarşı oyunlarında özünü yaxşı göstərdiyindən hollandların diqqətini cəlb edib.
Vaqif Cavadovun Hollandiyada uğurlu çıxışı indiyə kimi yolu Türkiyədən o yana düşməyən digər futbolçularımızın da Avropaya yolunu aça bilər.
|
