Prezident Administrasiyasının rəhbəri Ramiz Mehdiyevin telekanallarla bağlı dərc etdiyi məqalədən sonra bu sahədə müsbət dəyişiklik müşahidə edilib-edilmədiyi barədə MM mədəniyyət məsələləri üzrə komitəsinin sədri, millət vəkili Nizami Cəfərovun fikrini soruşduq. Telekanallarda hərəkətin müşahidə olunduğunu bildirən millət vəkili dedi:
- "Azad Azərbaycan" televiziya kanalında xüsusi bir ekspert şurası yaradıldı. Yəqin ki, Dövlət Televiziyası və digər özəl televiziyalarda da hərəkət var. Əsas məsələ bunları göstərmək, demək, bu vəziyyətin özünün nə şəkildə olduğunu təsvir etmək idi. Bundan sonra, əlbəttə, inkişaf da olacaq və vəziyyətdən çıxış yolları axtarılacaq. Buna nə dərəcədə nail olunacaq, bu başqa bir məsələdir. Ancaq hər halda dəyişiklik olacaq.
- Ramiz müəllimin məlum məqaləsindən sonra televiziya rəhbərləri ilə görüş keçirilməsinin aktuallığı qalırmı?
- Əslində Ramiz müəllimin bu məqaləsi bir qədər də görüşləri koordinasiya etdi. Sadəcə, büdcə məsələləri bir az başımızı qatıb. Bundan sonra Milli Məclisin mədəniyyət komitəsində televiziya rəhbərləri ilə görüşümüz olacaq. Ancaq bu görüş, ümumiyyətlə, televiziya siyasəti ilə bağlı olmayacaq. Görüş televiziyada mədəniyyət və incəsənət məsələlərinin təbliği ilə əlaqədar olacaq. Çünki bizim üçün maraqlı olan odur. Bədii proqramlar, onların səviyyəsi, aparıcılıq texnologiyaları, verilən filmlər, musiqilər, şou-biznesin televiziyada əks olunması texnologiyaları məsələləri ətrafında müzakirələr keçiriləcək.
- Yaxın aylarda mədəniyyət məsələləri komitəsində hansı yeni qanun layihələrinin müzakirəsi nəzərdə tutulub? Hansısa qanunlara əlavə və dəyişikliklər gözlənilirmi?
- Var, çoxdur. Hər dəfə hansısa qanunlara əlavə və dəyişikliklər baş verir. Bir müddət əvvəl bir neçə konvensiyanı mədəniyyət məsələləri komitəsində müzakirə etdik və onlar təsdiq olunacaq. Bundan başqa bir sıra qanunlar da var ki, onlara vaxtaşırı dəyişikliklər olunur və bununla bağlı müzakirələr keçirilir. Ancaq bizim əsas işimiz "Mədəniyyət haqqında" qanunla bağlı olacaq. Biz bu qanun üzərində çoxdan işləyirik. "Mədəniyyət haqqında" qanun 10 il əvvəl qəbul edilmiş bir qanundur. Çalışacağıq ki, onu müasir tələblərə, səviyyəyə uyğunlaşdıraq.
|
