Dünən Azərbaycan Mətbuat Şurası İdarə Heyətinin 2009-cu ildə son iclası keçirilib. Xəbərə görə, iclasın gündəliyinə qurumun illik fəaliyyətinə dair hesabatı, Şikayətlər üzrə Komissiyasının rəyləri əsasında Mətbuat Şurasının qərarlarının çıxarılması, Mətbuat Şurası "Reket jurnalistika"ya qarşı mübarizə Komissiyasının rəyləri əsasında qərarların çıxarılması və MŞ sıralarına qəbul məsələləri salınıb. İdarə Heyətinin üzvləri hesabatı müsbət qiymətləndiriblər. Hesabat əlavə və təkliflərlə birgə 2010-cu ilin yanvarında media və ictimaiyyətə təqdim olunacaq.
MŞ sıralarına qəbulla bağlı 5 müraciətə baxılıb. Müzakirələrdən sonra "Ailə həkimi", "Birlik", "Azərbaycan nəşrləri" jurnalları və "Media və Mülki Cəmiyyət" İctimai Birliyi MŞ sıralarına qəbul olunub. Qərara gəlinib ki, "Yeni xəbər" qəzetinin bir illik saylarının monitorinqi aparıldıqdan sonra bu nəşr MŞ sıralarına qəbul oluna bilər.
Sonra Şikayətlər üzrə Komissiyanın və "Reket jurnalistika"ya qarşı mübarizə Komissiyasının rəyləri əsasında da qərarlar çıxarılıb. "Gündəlik Bakı", "Zərbə", "Tolerant Azərbaycan", "Əsas xəbər", "Dünya kriminal", "Güzgü" qəzetlərinin və "Mozalan" jurnalının adları "reket nəşr" elan olunaraq, "Bizim vətən" qəzetinin adı isə xəbərdarlıq edilərək Şuranın "qara siyahı"sına salınıb.
"Qara siyahı"ya düşən bir sıra nəşrlər MŞ-yə fəaliyyətlərində dönüş yaratdıqları barədə müraciətlər ünvanlayıblar. Buna görə də iclasda "qara siyahı"ya düşən nəşrlərin oradan çıxarılması ətrafında da müzakirələr gedib. Bildirilib ki, bu məsələ MŞ-nin "Reket nəşr"lərin müəyyənləşdirilməsinə dair Təlimatında nəzərdə tutulan müddəalara uyğun olaraq tənzimlənəcək.
|
