"Ordunun Aynası" bu il sonuncu dəfə görüşünüzə gəlir. Ümumiyyətlə, bizim fəaliyyətimizin üçüncü mərhələsi başa çatır. 2005-ci ildən bu yana fəaliyyət göstərən "Ordunun Aynası" NATO-nun İctimai Diplomatiya Bölməsi tərəfindən dəstəklənir. Ötən dövrdə əlavədə Azərbaycanın NATO ilə əməkdaşlığı, bu çərçivədə imzalanmış çoxsaylı sənədlər, müdafiə və təhlükəsizlik sektorunda həyata keçirilən islahatların vəziyyəti, problemlər, gözləntilər və s. haqqında çoxsaylı təhlillər, şərhlər, müsahibələr, yanaşmalar əksini tapıb.

"Ordunun Aynası" fəaliyyət göstərdiyi dövrdə əsasən ordu islahatları, Azərbaycanın NATO ilə əməkdaşlıq planları ilə bağlı ictimai məlumatlandırma məqsədini hədəf götürüb. Buna nə dərəcədə nail olub-olmadığımızı yəqin ki, oxucular daha yaxşı bilər. Fəaliyyət göstərdiyimiz dövrdə bizə informasiya dəstəyi göstərdiklərinə görə xarici işlər, müdafiə, milli təhlükəsizlik nazirliklərinin, Daxili Qoşunlar və Dövlət Sərhəd Xidmətinin rəhbərliklərinə təşəkkürümüzü bildiririk. Təşəkkürümüz həm də 4 il ərzində bizi daim dəstəkləyən NATO İctimai Diplomatiya Bölməsinin əməkdaşlarına ünvanlanır.

"Ordunun Aynası"nın 2010-cu ildə də davam edəcəyinə ümid edirik. Amma bundan asılı olmayaraq "Ayna" qəzeti yeni ildə Azərbaycanın müdafiə və təhlükəsizlik sektorunda, Silahlı Qüvvələrdə baş verən prosesləri işıqlandırmaqda, necə deyərlər, ictimaiyyəti məlumatlandırmaqda davam edəcək.

Hələlik, "Ordunun Aynası" əlavəsinin qarşınızdakı buraxılışı 2009-cu ilin yekunlarına və 2010-cu il gözləntilərinə həsr olunur. Buraxılışın hazırlanmasında Azərbaycanda müdafiə və təhlükəsizlik sektoru üzrə "beyin mərkəzi" kimi çıxış edən yeganə qurum - Hərbi Analitik Tədqiqatlar Mərkəzinin (HATM) araşdırmalarından istifadə olunub.