Dünən Ağır Cinayətlərə Dair İşlər üzrə Məhkəmədə Azərbaycanda sifarişli qətllər törədilməsində iştirakda təqsirləndirilən Gürcüstan vətəndaşı Nəbi Əflatun oğlu Əliyevin cinayət işi üzrə məhkəmə prosesi yekunlaşıb. APA-nın xəbərinə görə, hakim İradə Həsənzadənin sədrliyi ilə keçirilən prosesdə hökm elan olunub. Məhkəmənin hökmü ilə təqsirləndirilən Nəbi Əliyev 14 il müddətinə azadlıqdan məhrum edilib.
İttihama görə, 1969-cu il doğumlu Nəbi Əflatun oğlu Əliyev 2009-cu il fevralın 20-də Özbəkistanda tutularaq Bakıya gətirilib. Nəbi Əliyev xüsusilə ağır cinayətlərdə təqsirləndirilərək, 15 il azadlıqdan məhrum edilən Gürcüstan vətəndaşı Müğdət Ömərovun dəstəsinin üzvüdür.
İstintaq müəyyən edib ki, Müğdət Ömərov atası İmran, qardaşları Naqmat və Hümmət, tanışları Füzuli Məmmədov, Şahbaz Eminov, Nəbi Əliyev, Bəylər Allahverdiyev, Fərəc Fərəcov və Ramiz Ələkbərovdan ibarət dəstə yaradıb. Müğdət Ömərov dəstəsinin üzvlərini odlu və soyuq silahlarla silahlandırıb. Cinayətkar dəstə çoxsaylı basqınlar törədib, adam oğurluğu ilə məşğul olub. Dəstə başçısı Müğdət Ömərov, dəstənin üzvləri - Naqmat və Hümmət Ömərovlar, Şahbaz Eminov, Bəylər Allahverdiyev, Fərəc Fərəcov, Ramiz Ələkbərov 2005-ci ildə Ağır Cinayətlərə Dair İşlər üzrə Məhkəmədə mühakimə olunublar və müxtəlif müddətlərə azadlıqdan məhrum ediliblər.
2008-ci ilin sonlarında Nərimanov rayon Polis İdarəsi 18-ci polis bölməsinin əməkdaşları dəstənin daha bir üzvü, hadisələr cərəyan edən vaxt adı istintaqa məlum olmayan 1966-cı il təvəllüdlü Füzuli Vahid oğlu Məmmədovu Sabunçu rayonu ərazisində həbs ediblər. Müğdət Ömərov dəstəsinin üzvü Füzuli Məmmədova iş adamı Vahid Ağalarovun qətlə yetirilməsini sifariş verib. M.Ömərovdan sifariş alan Füzuli Məmmədov dəstənin digər üzvləri ilə birlikdə iş adamını vəhşicəsinə qətlə yetirib. Onlar cinayəti Bakı-Samux yolunun kənarında, Çaylı kəndindəki Alaqışlaq adlanan sahədə törədiblər və meyitə od vuraraq yandırıblar. Füzuli Məmmədov Ağır Cinayətlərə Dair İşlər üzrə Məhkəmənin hökmü ilə 12 il müddətinə azadlıqdan məhrum edilib.
Qeyd edək ki, N. Əliyev 2000-ci ilə kimi qüvvədə olmuş Cinayət Məcəlləsinin 70-ci (qanunvericilikdə nəzərdə tutulmayan silahlı birləşmələrin və ya qrupların yaradılması), 94-cü maddənin 1-ci və 8-ci bəndləri (qəsdən adam öldürmə), hazırda qüvvədə olan Cinayət Məcəlləsinin 120.1-ci (qəsdən adam öldürmə), 217-ci (banditizm), 228-ci (qanunsuz silah saxlama) maddələri ilə ittiham olunub.
|
