Daşkənddəki Azərbaycan Mədəniyyət Mərkəzləri Assosiasiyası 31 dekabr - Dünya Azərbaycanlılarının Həmrəyliyi Günü münasibətilə mərasim keçirib. Assosiasiyanın sədri Akif Ağatalıbov törəndə çıxış edərək dünyanın müxtəlif ölkələrində yaşayan soydaşlarımızın təşkilatlanması işində bu bayramın əhəmiyyətindən danışıb. Daşkənd Beynəlmiləl Mədəniyyət Mərkəzinin sədri Nəsrəddin Məhəmmədiyev Azərbaycan ilə Özbəkistan arasında dostluq və qardaşlıq əlaqələrinin tarixi kökləri haqqında söhbət açıb, şair və yazıçıların dostluğu haqqında danışıb. Törən konsert proqramı ilə davam edib. Özbəkistanın xalq artisti, Azərbaycanda da çox sevilən müğənni Fərrux Zakirov Rəşid Behbudovun "Evləri var, xana-xana" mahnısını, Bakıda keçirilən Beynəlxalq Muğam Festivalının birinci mükafatını almış Yulduz Turdıyeva "Qarabağ şikəstəsi"ni, "Azəri qızları" uşaq rəqs ansamblının üzvləri milli rəqslərimizi, İlham Abdullayev sazda el havalarımızı ifa ediblər.
Belarus Dövlət Filarmoniyasında isə Azərbaycanın səfirliyinin təşkilatçılığı ilə Dünya Azərbaycanlılarının Həmrəylik Günü münasibəti ilə bayram konserti təqdim olunub.
Səfir Əli Nağıyev qonaqları salamlayaraq, ölkə başçısı İlham Əliyevin dünya azərbaycanlılarına ünvanlanmış müraciətini diqqətə çatdırıb. Qeyd edək ki, bayram proqramını əməkdar artist Zabit Nəbizadə, Elnarə Abdullayeva, Ələsgər Məmmədov və Xəyyam Məmmədov musiqi töhfələri ilə davam etdiriblər. Mərasimdə Belarusun hökumət strukturlarının və ictimaiyyət nümayəndələri, Minskdə akkreditə olunmuş diplomatik korpusun nümayəndələri, Belarusdakı Azərbaycan diasporunun üzvləri iştirak ediblər.
|
