Bu həftə Azərbaycan Prezidenti yanında Kütləvi İnformasiya Vasitələrinin İnkişafına Dəstək Fondu noyabr ayında elan etdiyi fərdi jurnalist yazıları müsabiqəsinin yekunlarını açıqladı. Müsabiqə 18 nominisiya üzrə keçirilmişdir. Jurnalistlər bilik və bacarıqlarını vətəndaş cəmiyyətinin, hüquqi dövlət quruculuğunun, fikir, söz və məlumat azadlığının inkişafı, Ermənistan-Azərbaycan, Qarabağ münaqişəsi, sosial qayğıya ehtiyacı olanların probleri və sair istiqamətlərdə yazılarla nümayiş etdirməli idilər.
Fondun icraçı direktoru Vüqar Səfərlinin sözlərinə görə, bir ay ərzində davam edən müsabiqəyə 85 iş təqdim olunmuşdur, bunların 33-ü qalib seçilmişdir. Fərəhli haldır ki, iş yoldaşımız Mir Abas Məmmədov də müsabiqədə fərqlənənlər sırasındadır. Onun dekabrın 5-də "Ayna" qəzetində dərc edilən "Nargin düşərgəsindən qaçışlar" materialı münsiflər tərəfindən yüksək qiymətləndirilmişdir.
Dünən müsabiqə qaliblərinə diplomlar və pul mükafatları təqdim olunmuşdur.
|
