Müğənni-bəstəkar Rəhim Rəhimlinin rejissorluq ideyası artıq həllini tapacaq. Xatırladaq ki, bir müddət əvvəl həmkarlarından birinin konsert proqramının ekran versiyasını öz üzərinə götürəcəyi barədə silsilə xəbərlər verən sənətçi sonradan sükuta qərq oldu. Bir müddət sonra isə ideyasını yenidən təzələmək həvəsinə düşdü. Bu barədə açıqlama verərkən bildirib ki, səhnədə yığdığı uzun illərin təcrübəsi onun rejissor kimi işləməsinə kömək olacaq.
"Özümü bir çox sahələrdə sınamışam. Bəstəkar, aparıcı, müğənni kimi fəaliyyət göstərirəm, indi də rejissor olmaq istəyirəm. Əvvəllər rejissor kimi özümü sınamamışam, lakin indi əlimə gözəl fürsət düşüb. Bu fürsəti dəyərləndirməyi düşünürəm".
Rəhim Rəhimlinin sözlərindən belə aydın oldu ki, tezliklə adını sirr saxladığı bir sənət adamının yaradıcılıq gecəsi keçiriləcək. Həmin tədbirin işıqlandırılması Rəhim Rəhimliyə həvalə edilib. Yeni peşənin astanasında olan müğənni mesajı ilə də yadda qaldı. O bildirdi ki, onun rejissorluq işi bu peşə ilə məşğul olanlara şounun necə hazırlanmasını göstərəcək.
|
