İyirmi altı yaşlı müğənni Emi Uaynhaus könüllü şəkildə polisə təslim olub. Səbəb isə Londondan 30 km şimalda yerləşən Milton Keynes teatrında yaratdığı qalmaqaldır. İttiham elan olunandan dərhal sonra müğənni həbs edilib və bir neçə saatdan sonra girov müqabilində sərbəst buraxılıb. Xarici mətbuatın yazdığı son xəbərlərdə bildirilir ki, hadisə ilə bağlı gələn il yanvarın 20-də məhkəmə olacaq.
Xatırladaq ki, keçmişdə Emi dəfələrlə həbsə məruz qalıb. Əsasən də indi həbsdə olan keçmiş əri Bleyk Filder Sivilə qarşı məhkəmə prosesini pozmaq üçün hakimləri ələ almağa, eləcə də narkotik saxlamağa görə həbsdən yaxa qurtaran Emi Uaynhaus bu ilin iyulunda xeyriyyə konsertində rəqqasə Şirin Flesi də vurduğu üçün belə aqibət yaşayıb. Lakin davakar müğənni Londonda keçirilən məhkəmə prosesində hakimləri inandıra bilib ki, onunla şəkil çəkmək istəyən Şirini, sadəcə, itələyib.
Emi Uaynhaus 2009-cu ildə "İlin diski", "İlin mahnısı" və "İlin debütü" nominasiyaları daxil olmaqla, 5 qızıl qrammofonun ödülçüsüdür və Britaniyada 30 yaşına qədər musiqiçilər arasında ən varlı müğənnilərdən biridir. "The Sunday Times"ın yazdığına görə, onun sərvəti 10 milyon funta yaxındır.
|
