Son aylar gah evlənəcəyini, gah da uzun bir serialda baş qəhrəman obrazını oynayacağını bəyan edən müğənni Elnurdan daha bir xəbər eşitdik. Müğənni muğamlarımızdan birini tamam-dəstgah şəklində oxumağa qərar verib.

Müğənni deyir ki, əslində muğam oxumaq onun sənətində yenilik hesab edilmir. Lakin bunlar dəstgah şəklində ifa edilmədiyindən böyük mənada səslənməyib. Səs imkanlarına güvənən müğənni musiqi arxivimizi zənginləşdirmək üçün belə bir ideyaya qoşulduğunu bildirdi. Səsinin zilinin və bəminin olduğunu deyən Elnur bu səbəbdən hamını təəccübləndirəcək bir seçim etdiyini bildirdi. Lakin onun hansı muğamı ifa edəcəyini açıqlamır.

Xatırladaq ki, Elnur vaxtilə əməkdar artist, xanəndə Zabit Nəbizadədən muğam dərsləri alıb. Müəllimi hələ bir neçə il əvvəl Elnuru muğam oxumağa həvəsləndirib. Lakin milli estradaya meyilli olan müğənni bunun üçün bir qədər zamana ehtiyacı olduğunu bildirib:

"Muğamı sistemli şəkildə öyrənmək, onu mənimsəmək demək deyil. Muğam oxumaq üçün uzun illər çalışmaq lazımdır. Mən həmin zamanı qazandım və bu gün dəstgah şəklində muğam ifa edəcəyimə əmin olmuşam. Yaxın günlərdə yeniliyə şahid olarsınız".