Toy atmosferinin sonunda qətl | Kriminal

Hər şey bu il avqustun 7-də toy gecəsindən başlanıb. İndi təqsirləndirilən şəxs qismində məhkəmə qarşısında dayanan bu iki nəfər öz dostları Tofiqin "Elçin" şadlıq sarayında toy mərasimində iştirak edirdilər. Toydan çıxan Enişov və Qayıbalıyev yolda S. adlı qızı tutaraq gizli bir yerə aparıblar. Onlar qızla əyləniblər.

Ertəsi gün bu iki nəfər İmişli şəhərində yerləşən "Yaşıl" kafesinə gəliblər. Orada çörək olmadığından kafenin sahibi Yaşar Cəfərovla birlikdə çörək almağa gediblər. Yolda Cəfərovun idarə etdiyi "Mercedes" markalı maşında Qayıbalıyevlə Cəfərov mübahisə ediblər. Nəticədə Qayıbalıyev bıçaqla Cəfərovu vuraraq qətlə yetirib. İmişli rayon Polis Şöbəsi əməkdaşlarının az sonra keçirdikləri əməliyyat tədbirləri nəticəsində hər iki şəxs tutulub.

İmişli rayon sakinləri - 1987-ci il doğumlu Sərxan Enişovun və Elvin Qayıbalıyevin cinayət işi üzrə məhkəmə prosesi başladı. Cinayət işi Ağır Cinayətlərə Dair İşlər üzrə Məhkəmədə keçirilir. Prosesin əvvəlində dövlət ittihamçısı Eldar Həmzəyev ittiham aktını elan etdi. Prokurorun çıxışından sonra sərbəst ifadə verən təqsirləndirilən şəxslər elan olunmuş ittiham üzrə özlərini qismən təqsirli bildilər. Elvin Qayıbalıyev ifadəsində qeyd etdi ki, zorlama cinayəti törətməyiblər. Öldürdükləri şəxslə bağlı ifadə verərkən təqsirin öləndə olduğunu bildirdilər.

Məhkəmə prosesi dekabrın 28-də davam etdiriləcək.