70 yaşda gənc qalmağın sirri | Mədəniyyət

Yetmiş yaşda da gənc qalmaq olarmış. 70 yaşını qeyd edən xalq artisti Tariyel Qasımov bunun sirrini açdı: paxıl olma, həsəd içini yeməsin, başqasının sevincinə şərik ol... Sağlam rəqabətin deyil, daha çox vicdansız rəqabətin at oynatdığı indiki teatr-musiqi mühitində bu davranış normasını seçmək və daim ona riayət etmək hər sənətçinin işi deyil. Bəlkə də bu onlarda nəsillikcədir, gendən gəlir. Hər halda, 70 yaşlı aktyorun yaşı 90-ı haqlamış anası Yaqut xanım sakitcə zalda əyləşib, diqqətlə səhnədə baş verənləri izləyirdi. Nə fikirləşirdi görən Yaqut ana?

Teatr və kino aktyoru Tariyel Qasımovun çalışdığı Gənc Tamaşaçılar Teatrında yubiley törəni məzmunlu təşkil edilmişdi. Arabir söz verilən sənət adamları onu bir insan kimi səciyyələndirir, sənətinə qiymət verir, arzularını bildirir və mütləq onun bu yaşda çox gənc qaldığını vurğulayırdılar. Teatrşünas İlham Rəhimlinin dediklərindən: "Nadir akytor olub ki, bəxtəvərliyə nail olub. Belə sənətkarlardan biri Tariyel Qasımovdur. Bu teatrda böyük teatr xadimlərindən Yusif Vəliyev, Hüseynağa Sadıqov, Süleyman Ələsgərov, Osman Hacıbəyov və onlarca digərləri ilə çiyin-çiyinə çalışıb. Akytor var 20, 30, 40 yaşında nimdaşdır, amma Tariyel heç vaxt nimdaş olmayıb. Tariyel həmişə gəncdir, yaraşıqlıdır". (Zalda yanaşı əyləşdiyimiz eloğlu mühəndis əyilib yavaşca deyir: "Tariyel burdan çıxan kimi gözmuncuğu assa yaxşıdır").

Tariyel Qazağın Köçəsgər kəndindən gəlib Bədən Tərbiyəsi İnstitutuna daxil olmuşdu. Lakin bir gözü idmanda, bir gözü teatrda olub, ikinci kursdan etibarən Lütfi Məmmədbəyovun dram dərnəyinə getməyə başlayıb və tezliklə Gənc Tamaşaçılar Teatrında rol alıb. Onda "nəsə görüblər" və teatr müdiriyyəti məktub yazıb onu köçürmə yolu ilə Teatr İnstitutuna dəyişiblər.

REKLAM

Burada teatr və dram aktyorluğu fakültəsinin - Rza Təhmasibin kursuna qəbul olunub. Üçüncü kursda ikən Dram Teatrına işə qəbul olunub.

Məzun olduqdan sonra Gənc Tamaşaçılar Teatrını seçib. Sonra Naxçıvan Musiqili Dram Teatrında, İrəvan Azərbaycan Teatrında çalışıb. Yenidən Gənc Tamaşaçılar Teatrına qayıdıb, sonra Qazax Dövlət Dram Teatrında bədii rəhbər və direktor işləyib. Bir ara Dərbənddə Azərbaycan Teatrında çalışıb. İndi yenə də Gənc Tamaşaçılar Teatrındadır.

Teatrşünas İlham Rəhimlinin "bir amerikan aktyorundan" gətirdiyi sitat: "Teatr aktyorunun sənəti buzdan möhtəşəm heykəl düzəldən sənətkara bənzəyir. İllər keçdikcə bu buz əriyir, o aktyorun adı qəzet vərəqlərindən, arxiv materiallarından və adi fotolardan başqa heç nədə qalmır". İlham Rəhimli əlavə edir: "Çox təəssüf ki, teatr aktyorları bu taleyə məhkumdurlar. Çox az tamaşalar olur ki, onların lent yazıları qorunub saxlanır. Ancaq Tariyel burada da xoş naxışlıdır, ona görə ki, müxtəlif ölkələrdə onlarca filmə çəkilib. Bu filmlərə həmişə baxılacaq, seviləcək".

Rəqəmlərə görə, Tariyel Qasımov indiyədək teatr səhnələrində 100-dən artıq obrazı canlandırıb. Çəkildiyi kinostudiyaların və filmlərin də sanballı siyahısını təqdim edə bilir. Söhbət 35-ə qədər filmdən gedir. Etiraf edək ki, bir aktyor üçün yaxşı göstəricidir. Yubiley gecəsini onun bir vaxt çəkilmiş olduğu filmlərdən epizodlar müşayiət edirdi. Biz aktyoru hər yaşda görür və xatırlayırdıq. Onun baxışı, sifət quruluşu, temperamenti özəlliklə orta asiyalı rejissorlar üçün əsl tapıntı idi. "Qızıl rəngi" (Türkmənfilm), "Əlvida, Yaşıl Yay", "Həyatın mənası", "Odlu yollarla", "Sahib" (Özbəkfilm), "Çilidə gecə" (Mosfilm), "Rüstəm və Zöhrab" (Tacikfilm, 3 seriyalı, rejissor Boris Kimyagərov)... Onunla Almaniyadan da maraqlandılar və azərbaycanlı aktyoru "Sonya raport verir" (DEFA, Almaniya, rejissor Stefan Bernhard) filmində gördük.

Və əlbəttə, Azərbaycanfilm. Onun çəkildiyi filmlərdən bəzilərini xatırlayaq: "Liftçi qız", "Ad günü", "Axırıncı aşırım", "Babək", "Dədə Qorqud", "Həyat, sən kiminsən", "İstintaq", "Qəzəlxan", "Qorxma, mən səninləyəm", "Nəsimi", "Vulkana doğru"....