Üzeyir Hacıbəyov adına Bakı Musiqi Akademiyasında əməkdar artist Məcnun Kərimovun rəhbərlik etdiyi qədim musiqi alətləri dövlət ansamblının konserti olub. Musiqi Akademiyası nəzdindəki məktəb-studiyanın 30 illik yubileyinə həsr olunmuş tədbirdə çıxış edən Məcnun Kərimov ansamblın 1996-cı ildə prezident Heydər Əliyevin sərəncamı ilə yarandığını, hazırda Azərbaycan Musiqi Mədəniyyəti Dövlət Muzeyinin nəzdində fəaliyyət göstərdiyini, indiyədək bir çox xarici ölkədə milli mədəniyyətimizi layiqincə təbliğ etdiyini bildirib. Qədim dövrlərdən bəri ölkəmizin musiqi mədəniyyətində 60-dan çox alətdən istifadə edildiyini vurğulayan bədii rəhbər onlardan 11-nin BMA-nın nəzdindəki qədim musiqi alətlərinin bərpası laboratoriyasında bərpa olunaraq ansamblda istifadə olunduğunu söyləmiş və bu alətlər haqqında ətraflı bilgi vermişdir. Qeyd edək ki, indiyə qədər cəng, qopuz, çıqani, tambur, rübab, rud və digər musiqi alətləri XII-XIV əsr Azərbaycan alimləri - XIII əsrdə Şərqdə ilk musiqi nəzəriyyəsini yaratmış Səfiəddin Urməvi və 38 musiqi əsəri bizə gəlib çatan Əbdülqədir Marağayinin əsərlərindəki təsvirlər əsasında bərpa edilib. Bu alətlərdə ifa təliminə dair proqram hazırlanmışdır.
|
