Gəncə Dövlət Dram Teatrının kollektivi qastrol səfərlərinə hazırlaşır. Bu barədə teatrın direktoru Əli Qasımov məlumat verib. Onun xəbərində bildirilir ki, yaxın ayların birində teatr kollektivi Bakı və Sumqayıta səfər edəcək. Qastrol səfərində Elçinin "Qatil", Mirzəməhəmməd Axundovun "Qanun dəllalı", Əli Əmirlinin "Varlı qadın" əsərləri oynanılacaq.
Məlumatda qeyd olunur ki, "Qatil" və "Qanun dəllalı" tamaşalarının quruluşçu rejissoru əməkdar artist Vaqif Şərifovdur. "Varlı qadın" səhnə əsərinə isə teatrın baş rejissoru Bəhram Osmanov quruluş verib.
Yeri gəlmişkən, onu da bildirək ki, Gəncə Dövlət Kukla Teatrının kollektivi də teatr festivalına qatılacaq. Teatrın baş rejissoru Fərmayıl Paşayevin məlumatına görə, festival gələn ilin yanvar ayında Bakıda keçiriləcək. Teatr rejissorunun sözlərinə görə, kollektiv festivalda "Şəngülüm, şüngülüm, məngülüm" adlı tamaşa ilə çıxış edəcək. Tamaşanın quruluşçu rejissoru Fərmayıl Paşayev özüdür. Bundan başqa, yeni ilin gəlişi ilə bağlı teatr kollektivi "Karnaval-karnaval" adlı tamaşa üzərində məşqlərini yekunlaşdırırlar. Tamaşa yeni ilin ilk günündən təqdim ediləcək. Tamaşada canlı aktyor oyunu ilə yanaşı, video çarxlardan istifadə də nəzərdə tutulur.
|
