"Ölkədə "Onkoloji yardım haqqında" qanun qəbul edilməsinə baxmayaraq, onkoloji xəstə kimi qeydə alınan insanlara dərman preparatları pulla verilir". Millət vəkili İntizam Əkbərlinin sözlərinə görə, hətta 100-150 manata başa gələn dərman vasitələri xəstəxananın özündə satılır: "Artıq səhiyyə sistemində elə vəziyyət yaranıb ki, onun qarşısını almaq istiqamətində ciddi addımlar atılmalıdır. Şəkərli diabet xəstələrinin dərman preparatları ilə təmini üçün dövlət tərəfindən kifayət qədər vəsait ayrıldığı halda, onların pulla satılması baş verir. Belə bir şəraitdə rayon yerlərində tüğyan edən vərəm xəstəliyinə qarşı necə mübarizə aparılacaq?"
Millət vəkilinin bildirdiyinə görə, ölkənin kənd rayonlarında vərəm xəstəliyi kütləviləşib: "Təkcə İmişli rayonunda 552 nəfər vərəmli xəstə rəsmi qeydiyyata alınıb. Ancaq qeyri-rəsmi məlumata görə, belə xəstələrin sayı 1000 nəfərdən artıqdır. 110 min əhalisi olan bir rayon üçün 552 vərəmli xəstənin qeydə alınması səhiyyədəki dəhşətli vəziyyətdən xəbər verir".
|
