Xaçmaz rayonunun Nabran qəsəbəsində yeni turizm, idman və kurort mərkəzi inşa olunacaq. Azərbaycan Mədəniyyət və Turizm Nazirliyindən "APA-Economics"ə verilən bilgiyə görə, turizm və kurort mərkəzinin tikinti layihəsinin məqsədi Xaçmazda müvafiq turizm xidmətləri göstərməkdir. Belə ki, burada yaşıl meşələr, dağlar, bulaqlar və s. var: "Xəzər dənizinin Xaçmazda yerləşən hissəsinin çimərlik turizminin inkişaf etdirilməsi baxımından böyük potensialı var".
Layihə 15 ilə icra olunacaq. Ümumi dəyəri 110 mln. ABŞ dolları olan layihənin 109 mln. dolları kredit şəklində cəlb olunacaq, digər 1 mln. dolları isə layihənin icraçısı olan "Xudat-Balıq-I" ASC tərəfindən ayrılacaq.
Qeyd edək ki, layihə Regionların sosial-iqtisadi inkişafı Dövlət Proqramı çərçivəsində hazırlanıb və hazırda potensial investorların müəyyənləşdirilməsi istiqamətində iş aparılır.
|
