Azərbaycan istehsalı olan İST-14,5 "İstiqlal" snayper tüfənginin təkmilləşdirilməsi nəzərdə tutulur. Bu barədə APA-ya Müdafiə Sənayesi Nazirliyindən məlumat verilib. Artıq "İstiqlal"ın çəkisi əvvəlkindən az və daha kiçik çaplı (12,7 mm) ikinci modeli yaradılıb. Eyni zamanda birinci modelin üzərində təkmilləşdirmə işləri aparılaraq silahın davamlılığının, atəş təsirinin saxlanılması şərti ilə çəkisinin azaldılması, dayaq sisteminin modernləşdirilməsi, habelə daşınmasının asanlaşdırılması üçün bəzi dəyişikliklər nəzərdə tutulur.
Qeyd edək ki, ilk dəfə İstanbulda keçirilən İDEF-2009 beynəlxalq müdafiə sərgisində nümayiş etdirilən İST-14,5 snayper tüfənginin uzunluğu 2015 mm-dir. Tüfəng dəzgah üzərində tətbiq olunur. Hədəfi məhvetmə məsafəsi 3 min metr olan "İstiqlal" -50 və + 50 dərəcə temperaturlarda belə rahat istifadə oluna bilir. Yağmur, palçıq, qar və toz təsirinə davamlı olan bu snayper tüfəngini iki hissəyə ayırmaqla çantada daşımaq mümkündür.
|
