Azərbaycanın bəzi müxalifət partiyaları Avropa Şurasının (AŞ) bələdiyyə seçkiləri üzrə müşahidə missiyası ilə görüşdən növbəti dəfə imtina edib. Azərbaycan Demokrat Partiyasının (ADP) sədri Sərdar Cəlaloğlu APA-ya açıqlamasında bildirib ki, bu addım AŞ missiyası rəhbərlərinin seçkilərlə bağlı qeyri-obyektiv və qeyri-səmimi mövqe nümayiş etdirməsinə, siyasi etika normalarına riayət etmədiyinə və bütövlükdə AŞ-nin Azərbaycanın demokratikləşməsində öz üzərinə düşən vəzifələri layiqincə yerinə yetirmədiyinə etiraz əlaməti olaraq atılıb: "Avropa Şurası Azərbaycana təsadüfi adamları müşahidəçi kimi göndərir. Avropa Şurası qanun pozuntularına heç bir reaksiya vermir".
S.Cəlaloğlunun sözlərinə görə, sonuncu dəfə bu müşahidə missiyası ilə təyin olunan görüşdə baş verən etik qaydalara zidd hərəkətə görə onlar üzr istəmək əvəzinə, qeyri-real fikirlər işlədirlər: "Ona görə də bu, mənasız görüşdür. Əslində belə görüşlərə getmək millətə xəyanətdir".
Qeyd edək ki, Avropa Şurasının müşahidə missiyası müxalifət partiyalarını gələn həftə görüşə dəvət edib. Dəvət edilən Demokrat, Müsavat, Ümid, Xalq Cəbhəsi, Vətəndaş və İnkişaf, Liberal partiyaları görüşdən imtina ediblər.
Xatırladaq ki, AŞ-nin Yerli və Regional Hakimiyyətlər Konqresinin müşahidə missiyası dekabrın 7-8-də Azərbaycanda səfərdə olub. Daha geniş tərkibli missiyanın bir başqa səfəri dekabrın 20-də başlayacaq.
Maraqlıdır ki, missiya bir neçə gün əvvəl müxalifətçiləri görüşə dəvət etsə də, onları bir neçə saat qapı arxasında gözləməyə məcbur edib. Buna etiraz əlaməti olaraq müxalifətçilər görüşü boykot ediblər.
|
