Narkotiklərdən istifadəyə görə ötən il həbs edilən və bu günlərdə azadlığa buraxılan reper Hüseyn Dərya vaxtını ailəsi ilə birlikdə keçirir. Azadlığa çıxan gündən sevincinin həddsiz olduğunu bildirən reper artıq pis əməllərə son qoyduğunu bildirib. Lakin onun geridə qoyduğu anları reperin yaradıcılığa başlamasına hələ ki imkan vermir. Bir qədər düşünməyə ehtiyacı olduğunu bildirən reper beynindəki sıxıcı hisslərdən tamamilə xilas olmaq niyyətindədir. Bundan sonra onun yaddaşında yığılıb qalan yeni rep əsərləri geniş kütlənin ixtiyarına veriləcək:
"Həbsxana həyatından uzaqlaşandan sonra bir neçə yaxın dostum məndən nə vaxt yeni repin yazılacağını xəbər alırlar. Amma onları başa salıram ki, qısa zamanda heç nə ərsəyə gələ bilməyəcək. Repin yazılması üçün gərək düşüncəmdəki sıxıntılardan azad olum. Həbsxana həyatını geridə qoymağıma baxmayaraq, həmin atmosferdən tamam azad ola bilməmişəm. Bir qədər zamana ehtiyacım var. Gərgin günləri geridə qoyandan sonra iş rejiminə keçəcəm. Ümid edirəm ki, bu, böyük bir zaman itkisi hesabına başa gəlməz. Çünki hər gün yaxşılığa doğru irəlilədiyimi başa düşürəm. Bir qədər də stimula ehtiyacım var. Bunu mətbuat, yaradıcı dostlarım məndən əsirgəmir. Belə davam etsə, tezliklə meydana hamını təəccübləndirən replər çıxacaq".
Hüseyn Dərya düşünmə mövqeyində olduğundan onun üçün hansı mövzuya maraq göstərdiyi yaxın günlərdə bəlli olacaq.
|
