Azərbaycanda fəaliyyət göstərən bank təşkilatlarının əhalidən cəlb etdiyi əmanətlər üzrə faiz dərəcələrinin (gəlirlik) azaldılması istiqamətində planları mövcuddur. Artıq bir sıra banklar bu istiqamətdə müvafiq addımlar atıb, bu isə öz növbəsində verilən kreditlərin faiz dərəcəsinə təsir göstərəcək. Bunu Azərbaycan Mərkəzi Bankının İdarə Heyəti sədrinin birinci müavini Alim Quliyev bildirib.
Alim Quliyevin sözlərinə görə, hazırda banklarda kifayət qədər likvid resurslar cəmləşib və bank sisteminin həmin resursların yerləşdirilməsi ilə bağlı problemi yaranıb. Bank sistemində artıq resursların yaranması isə böhran şəraitində bankların ehtiyatlı kredit siyasəti həyata keçirməsi ilə bağlıdır.
"Dünya maliyyə böhranı ilə bağlı ölkədəki bankların xaricdən maliyyələşmə mənbələri tükənib. Bir sıra bankların əhalidən cəlb etdiyi depozitlərin faiz dərəcəsinə baxılması üzrə düşüncələri mövcuddur. Artıq bəzi banklar tərəfindən bu istiqamətdə müvafiq addımlar da atılıb, bu isə verilən kreditlərin faiz dərəcəsinə öz təsirini göstərəcək. Cəlb olunmuş vəsaitlər nə dərəcədə ucuz olarsa, onun yerləşdirilməsi, yəni kreditləşmə də bir o qədər ucuz olacaq", - deyə AMB rəsmisi bildirib.
Qeyd edək ki, hazırda banklar tərəfindən əmanətlər orta hesabla illik 12-14%-lə qəbul olunur, kreditlər isə 20-24% dərəcəsi ilə verilir.
|
