Dünən Yevlaxda keçirilən "Karvan" - "Muğan" matçı ilə Unibank Premyer Liqasında XVI tur başlanıb. "Karvan" qələbə həsrətinə ilk dövrədə məğlub olduğu Salyanın "Muğan" klubu ilə matçda son qoymağa çalışsa da, bunu edə bilməyib. Matç heç-heçə başa çatıb - 1:1.
XVI turun mərkəzi görüşü Ağdamda ötən mövsümün mükafatçıları arasında baş tutacaq. Azərbaycan kubokunun son qalibi "Qarabağ" Premyer Liqanın bürünc mükafatçısı "Simurğ"u qəbul edəcək. "Qarabağ"ın baş məşqçisi Qurban Qurbanovun əslən Zaqataladan olması, həmçinin rəhbərlik etdiyi komandanın ilk dövrədə "Simurğ"a uduzması görüşün prinsipiallığını artırır.
"Altılığ"a düşmək uğrunda gərgin mübarizə aparan digər iki komanda Lənkəranda üz-üzə gələcək. "Qəbələ" səfər görüşündə "Xəzər-Lənkəran"a qalib gəlsə, turnir cədvəlində onu qabaqlaya bilər.
İkinci dövrədə zəif təsir bağışlayan "Neftçi" autsayder "Standard"ı sınağa cəkəcək. "Olimpik-Şüvəlan" isə çempion "Bakı"nın 3 oyunluq qələbə seriyasını dayandırmağa çalışacaq. Özü də bu vəzifə rəqibi çox yaxşı tanıyan Nazim Süleymanovun üzərinə düşür. Belə ki, Nazim Süleymanov son dövrlərədək "Bakı"da müxtəlif vəzifələrdə çalışıb.
XVI tur: 19 dekabr. "İnter" - "Turan", "Xəzər-Lənkəran" - "Qəbələ"; 20 dekabr: "Bakı" - "Olimpik-Şüvəlan", "Neftçi" - "Standard", "Qarabağ" - "Simurğ".
Bir qədər də əvvəlki tur barədə. Ötən tur qonaqlar üçün uğurlu keçib. Meydan sahibləri altı oyunun yalnız birində qalib gəliblər - "Qəbələ"nin son pillənin sahibi "Karvan" üzərində qələbəsi minimal hesablı olub.
Salyanda keçirilən görüşdə "Muğan" qələbəyə yaxın olsa da, "Neftçi" azlıqda qalan rəqib qapısına oyunun sonunda yol tapmaqla, məğlubiyyətdən xilas olub. Hər halda, növbəti vacib xal itkisinə məruz qalan "Neftçi" 7-ci pilləyə düşərək, "altılıq"dan kənarda qalıb. Bu, cari mövsümdə "flaqman"ın ən uğursuz nəticəsidir.
Səfərdə qələbə qazanan "Qarabağ", "İnter" və "Xəzər-Lənkəran" turnir cədvəlində ilk altılıqda mövqelərini bir qədər də möhkəmlədiblər. "Simurğ"dan ilk dövrədəki məğlubiyyətin əvəzini eyni hesabla çıxan "Bakı" turnir cədvəlində daha iki pillə irəliləyərək, 4-cü yerə yüksəlib. Bu, son ölkə çempionunun cari mövsümdə ən yüksək göstəricisidir. Yeri gəlmişkən, "Simurğ" 8 aylıq fasilədən sonra ilk dəfə öz meydanında məğlub olub.
Ötən turun nəticələri: "Turan" - "Xəzər- Lənkəran" - 1:2, "Muğan" - "Neftçi" - 2:2, "Qəbələ" - "Karvan" - 1:0, "Standard" - "Qarabağ" - 0:1, "Olimpik-Şüvəlan" - "İnter" - 0:1, "Simurğ" - "Bakı" - 1:2.
|
