Dövlət Akademik Opera və Balet Teatrında Bakı Xoreoqrafiya Məktəbinin 80 illik yubileyinə həsr edilən sənət törəni keçirilib.
Bakı Xoreoqrafiya Məktəbinin yubileyində iştirak etmək üçün bir çox xarici ölkələrdən - Rusiya, Belarus, Gürcüstan, İtaliya, Moldova, Ukrayna, Türkiyə, Albaniyadan tanınmış balet ustaları, xoreoqraflar təşrif buyurmuşlar. Bu yubiley törənində TÜRKSOY beynəlxalq təşkilatının nümayəndəsi Əflatun Nemətzadə, Neapol San Karlo Teatrının direktoru Cüzeppe Karbone, Moldovanın xalq artisti Yuri Qorşkov, Moldovanın əməkdar incəsənət xadimi Yuri Madan, Rusiyanın əməkdar incəsənət xadimi, professor Lyüdmila Kolençenko, Rusiyanın xalq artisti Valeri Anisimov, Rusiya Xoreoqrafiya Assosiasiyasının üzvü, tanınmış tənqidçi Aleksandr Maksov, Ukraynanın əməkdar incəsənət xadimi Sergey Svets, Tbilisi Xoreoqrafiya məktəbinin direktoru Zviad Bakradze iştirak ediblər.
Məlumat üçün bildirək ki, Bakı Xoreoqrafiya Məktəbinin məzunları, Rusiya Teatr Sənəti Akademiyasının dekanı, Rusiyanın və Azərbaycanın əməkdar artisti, fəlsəfə doktoru, professor Vitali Axundov, SSRİ və Belarusun xalq artisti, Belarus Dövlət Mükafatı laureatı, professor Valentin Yelizarov, İtaliyada "Azəri" Azərbaycan Mədəniyyəti Assosiasiyasının prezidenti, Orizon Rəqs Məktəbinin dosenti Mais Nuriyev, Latviya Milli Operasının solisti, beynəlxalq müsabiqələr laureatı Ülvi Əzizov da qonaqlar sırasında olublar. Qeyd edək ki, Bakı Xoreoqrafiya Məktəbi respublikamızda balet və xalq rəqsi sahəsində ixtisaslı artist kadrları hazırlayan yeganə tədris müəssisəsidir. Opera Teatrının balet truppası üçün milli balet artistləri hazırlamaq məqsədi ilə yaradılmış kiçik studiyadan Bakı Xoreoqrafiya Məktəbinə qədər böyük inkişaf yolu keçmiş bu sənət ocağı 80 il ərzində yüzlərlə yüksəkixtisaslı kadr hazırlayıb.
|
