Dekabrın 4-dən başlayan və ötən gün yekun vurulan "Alüminium" VI Beynəlxalq Müasir İncəsənət Biennalesində iştirak edən çoxsaylı ölkələrin rəssam və fotoqrafları Bakı haqqında təəssüratlarını bizimlə bölüşüblər. Fransız fotoqraf Jak Krim bildirib ki, bu onun Azərbaycana ikinci səfəridir və bu səfər çərçivəsində tədbirdə iştirakı ilə yanaşı, həm də paytaxtın fotolarını çəkib:
"Bu biennaledə mən portretlər də daxil olmaqla beş foto əsərimi nümayiş etdirdim. 4 il əvvəlki Bakıya səfərimlə indiki səfərim arasında şəhərdə olduqca böyük fərqlər gördüm. Ölkəniz çox inkişaf edib, çoxsaylı göydələnlər ucaldılıb. Burada olduğum müddətdə eyni zamanda işləyəcəyəm və gözəl şəhərinizin fotolarını çəkəcəyəm. Çəkdiyim fotoları isə Fransada təşkil olunacaq sərgilərimdə nümayiş etdirmək fikrindəyəm. Qismət olsa, Bakıda da öz sərgimi təşkil etmək istərdim".
Biennaledə iştirak edən norveçli fotoqraf Eli Qlada əvvəllər Azərbaycanda bir neçə dəfə olduğunu deyir:
"Bu biennaledə iştirak mənim üçün çox vacibdir və buradakı incəsənət işləri ilə birbaşa əlaqəm var. Norveçə gələn azərbaycanlı rəssamların bir neçəsi ilə tanışam və onların yaradıcılığını yüksək qiymətləndirirəm. Mən burada video və iki şəkil nümayiş etdirdim. Biennalenin yüksək səviyyədə təşkilini xüsusi qeyd etməliyəm və şəhərinizdə olmaqdan çox məmnunam".
Biennaledə Yaponiyanı təmsil edən, özü isə Parisdə yaşayan fotoqraf Midori Sakurai Bakıya ilk dəfə səfər etdiyini bildirib. Yaponiyalı fotoqraf ilk səfərinin onun yaddaşında xoş və unudulmaz xatirə kimi qalacağını qeyd edib. M.Sakurai yaxın müddətdə Bakıda sərgisinin təşkilini də arzu edib.
Türkiyəli fotoqraf və bir sıra qalereyaların direktoru olan Dənizhan Özər isə bunları qeyd edib:
"Bu mənim Azərbaycana ilk səfərimdir və ilk gəlişimdən buranı çox sevdiyimi etiraf etməliyəm. Azərbaycanın incəsənətlə məşğul olan insanlarını artıq tanıyıram, amma əvvəllər bununla bağlı çox da geniş məlumata malik deyildik. Azərbaycan incəsənətinin bir az qədim ənənələrin, bir az da rus sənətinin təsiri altında olduğunu sezdim. Çox gözəl haldır ki, burada yeni modern sənət də öyrənilir və təbliğ olunur".
Türkiyəli sənət adamı bildirib ki, Bakıda təşkil olunan biennale çox yüksək səviyyədədir və bu layihə çox təqdirəlayiqdir: "Dördüncü dəfə keçirilməsi də bunun bir isbatıdır. Azərbaycanın türk dünyasında yeri hər baxımdan çox önəmlidir. Hər kəs azərbaycanlı qardaşlarımıza böyük sevgi bəsləyir. Biz Azərbaycanın rəssamlarını, sənətlə məşğul olan insanlarını Türkiyədə görmək istəyirik. Bu, incəsənət sahəsində daha sıx əlaqələrə zəmin yaradar. Azərbaycan rəssamlarının Türkiyədə, Türkiyə rəssamlarının isə Azərbaycanda sərgilərinin az-az təşkil olunması maddi səbəblərlə bağlıdır. Mən artıq buranı gördüm və çox istəyirəm ki, iki il ərzində türkiyəli rəssamların Azərbaycana səfərini həyata keçirim. Rəhmətlik Nahid Kabakçı bir çox Azərbaycan rəssamının əsərlərini öz kolleksiyasına almışdı. Məhz Nahid Kabakçının səyi nəticəsində bu gün mən burdayam. Üç fotoşəkil gətirmişəm. Bura gəlişimin əsas məqsədi Azərbaycan rəssamları ilə tanış olmaq və onlarla işbirliyi qurmaqdır. Yazda Türkiyədə təşkil ediləcək Çanaqqala Biennalesinin kuratoruyam və həmin biennaledə Azərbaycanın da təmsil olunması yönündə danışıqlar aparacağam".
|
