Azad İstehlakçılar Birliyi şadlıq evlərilə istehlakçılar arasındakı münasibətlərin tənzimlənməsi təkliflərilə Milli Məclisə müraciət edib. Özü də təkliflər şadlıq evlərindən daxil olan şikayətlər əsasında hazırlanıb. Təkliflər sırasında şadlıq evi ilə istehlakçı arasında müqavilə bağlanması, müqavilənin şərtlərinin Nazirlər Kabineti tərəfindən təsdiqlənməsi, göstərilən xidmətlər müqabilində qəbz ödənilməsi, qidaların keyfiyyətinə rəsmən təminat verilməsi, əks halda cavabdehin məsuliyyət daşıması, səsin tempinin yüksəkliyinin müəyyən edilməsi, foto və video xidmətlərinin qiymətinin müəyyənləşdirilərək xidmətlər siyahısına salınması da var.
Öyrəndik ki, bu təkliflərin hazırlanmasına səbəb şadlıq evlərində istehlakçıların hüquqlarının pozulmasıdır. Bunu təbii ki, şadlıq evində toy etmək istəyən və ən azı bir dəfə toyda iştirak edənlər yaxşı bilirlər. Lakin onlar bu barədə kimə şikayət edəcəklər ki? Adətən belə problemlərin həlli ilə ictimai qurumlar məşğul olur. Nəhayət, bu problemi də qabartmaq istəyən və həllinə nail olmağa çalışan ictimai qurum tapıldı.
Azad İstehlakçılar Birliyinin sədri Eyyub Hüseynovun bildirdiyinə görə, şadlıq evlərində istehlakçı hüquqlarının pozulması bazarlarla müqayisə ediləcək səviyyədə artıb: "Köhnə qidalardan istifadə edilir, saxtalaşdırılmış sərinləşdirici və spirtli içkilər verilir, soyuq qidaların saxlanma şəraitinə riayət edilmir. Toy sahibi ilə aparılan danışıqlara riayət olunmur, toydan sonra istehlakçı aldadıldığını görür".
Yeri gəlmişkən, şadlıq evlərində pirotexnikadan istifadə təhlükəlidir. AİB sədri bu barədə toy sahiblərini məlumatlandırmağı təklif edir. Eyyub Hüseynov həyəcan təbili çalır: Rusiyada gecə barında pirotexnikadan baş verən yanğından nəticə çıxarmaq lazımdır. O deyir: "Şadlıq evləri təbii fəlakət və ya yanğınları nəzərə almalı, toy sahiblərini məlumatlandırmalıdır. Digər tərəfdən, əlavə işıqlandırma olmalıdır. Lakin əksər şadlıq evlərində əlavə işıqlandırma mövcud deyil. Toya gələnlər fövqəladə hadisələr zamanı giriş və çıxış qapılarını tanımalı, özünü qorumağı bacarmalıdırlar". Eyyub Hüseynov şadlıq evlərində pirotexnikaya nəzarəti vacib sayıb.
Nəzərəçarpan qanqaraldıcı problemlərdən biri də paytaxtda fəaliyyət göstərən şadlıq evlərində, restoran və barlarda uşaq əməyinin istismar edilməsidir. Bu məlumatı Azərbaycan Uşaq Fondunun Bakı şöbəsinin rəhbəri Teymur Rza da təsdiqləyir. Onun sözlərinə görə, monitorinqlər zamanı şadlıq evlərində vəziyyətin dəyişmədiyi bəlli olub: "Azyaşlıların işləməsinə qadağa qoyulmasına baxmayaraq, şadlıq evləri uşaqların əməyindən istifadə edir. Buna görə də şadlıq evlərinə rəsmi məktub göndərilib, qanunvericilikdə nəzərdə tutulan cəzalarla bağlı məlumatlar verilib, uşaq əməyinin qadağan olunduğu bildirilib. Lakin şadlıq evlərinin rəhbərləri məsuliyyəti valideynlərin üzərinə ataraq tədbirlər görmək istəmirlər. Valideynlər isə uşaqlarını işlətməklə qanunvericiliyə qarşı çıxdıqlarının fərqinə varmırlar".
T.Rza deyib ki, uşaqların əməyi müqabilində cüzi məbləğ ödənilir. Buna görə də valideynlərin maddi imkansızlığı bəhanə etməsi başadüşülən deyil. Mütəxəssisin fikrincə, uşaq əməyinin istismarının qarşısını almaq üçün təbliğata, maarifləndirməyə ehtiyac var. Birinci növbədə valideynlər uşaqlarının əməyini istismar etməməlidirlər.
