Türkiyə parlamentində 20 yeri olan Demokratik Toplum Partiyasının fəaliyyəti barədə açılan dava partiyanın qapadılması ilə nəticələndi. Dünən ölkənin Anayasa Məhkəməsi onun başqanı Haşim Kılıcın sədrliyi ilə belə bir qərar çıxardı. Məhkəmə öz qərarını belə əsaslandırıb ki, "DTP dövlətin ölkəsiylə və millətiylə bölünməz bütövlüyü əleyhinə aksiyaların qərargahına çevrilmişdir".

Konstitusiya Məhkəməsinin bu qərarı ilə sözügedən partiyanın 37 rəhbərinə 5 il siyasətlə məşğul olmaq yasağı da çıxarılmışdır. Onların arasında partiyanın sədri, Mardin millət vəkili Əhməd Türk və Diyarbəkir millət vəkili Aysel Tuğluq da var. Bu adamlar parlamentdən kənarlaşdırılmış oldular.

Bəlli olduğu kimi, bu partiya etnik kürd azlığın partiyası kimi formalaşıb, son seçkilərdə onlardan 20 nəfər parlamentə seçilmişdi. Lakin bu adamlar kürdlərin problemlərinin çözümü ilə məşğul olmaqdansa, əslində PKK terror təşkilatının dilmanclarına, toqquşmaların təhrikçilərinə və təşkilatçılarına çevrilmişdilər. Onların aksiyalarında PKK üzvləri də iştirak edir və PKK lehinə şüarlar qışqırırdılar. PKK-nın son xain terror aksiyaları isə ölkə əhalisinin səbir kasasını daşdırmışdır. Bir çox şəhərlərdə DTP-nin ofisləri hücumlara məruz qalmışdır. Bu hadisələr Türkiyə toplumu qədər Azərbaycan toplumunu da dərindən narahat etməkdədir.

Anayasa Məhkəməsinin bu qərarı "Milli Qəzetə"də dərc olunduqdan sonra qüvvəyə minəcəkdir.