Azərbaycanda fəaliyyət göstərən İranlı Mühacirlər Cəmiyyətində "21 Azər" hərəkatının 64-cü ildönümü ilə bağlı tədbir keçirilib. APA-nın məlumatına görə, cəmiyyətin sədri Əmirəli Lahrudi "21 Azər" hərəkatının başlanması, Pişəvəri hökumətinin qurulmasından danışaraq o zamankı tarixi vəziyyəti iştirakçıların diqqətinə çatdırıb.
Ə.Lahrudi hərəkatın Sovet İttifaqının xəyanəti nəticəsində yatırıldığını bildirib: "Pişəvəri hökuməti İranda ilk dəfə olaraq siyasi çevriliş yox, ictimai sistem kimi ortaya çıxdı və çoxlu sayda islahatlar həyata keçirdi".
Ə.Lahrudi hazırda İranda baş verən proseslərə də toxunub. Onun sözlərinə görə, İranın daxilində çoxlu sayda xalqlar yaşayır və onlar bir-birlərinə qaynayıb-qarışıblar: "Onları ayırıb müstəqil dövlət qurmaq üçün imkan yoxdur. Bununla bərabər İran sivil bir dövlət deyil və hər şey ordunun əlindədir".
Ə.Lahrudi İran hakimiyyətini bütün gəlirləri nüvə proqramına xərcləməkdə, xalqın sosial problemlərini həll etməməkdə suçladı.я
|
