Dünən Bakıda "Qafqazda təhlükəsizlik: yeni mühitdə köhnə mənzərə" mövzusunda konfrans keçirilib. APA-nın məlumatına görə, Norveç Atlantik Komitəsi tərəfindən təşkil olunmuş konfransda Azərbaycan, Türkiyə, Gürcüstan, İran, ABŞ və Norveçdən təmsilçilər, bir sıra ölkələrin Azərbaycan səfirləri iştirak edib.

Tədbirdə çıxış edən Norveç səfiri Yon Ramberg bildirib ki, ölkəsi hər bir zaman dünyada sülhün təmin olunmasına səy göstərib və bu səylər davam etməkdədir. Qafqaz regionunda sabitliyin Avropa və Asiya üçün mühüm əhəmiyyət kəsb etdiyini deyən səfir keçirilən konfransın da bu silsilədən olduğunu qeyd edib.

Tədbirdə ABŞ Milli Müdafiə Universitetinin professoru, hərbi ekspert Rocer Kanqas isə bildirib ki, enerji təhlükəsizliyi bu gün dünya üçün çox əhəmiyyət kəsb edir. "Cənubi Qafqazda təhlükəsizliyin iqtisadi və enerji amilləri" adlı qrup müzakirələrində "ABŞ-ın Cənubi Qafqazda enerji və nəqliyyat məsələləri üzrə perspektivləri" mövzusunda çıxış edən ekspert 2008-ci ildə Gürcüstan müharibəsinin bu məsələnin aktuallığını üzə çıxardığını deyib. Ekspert regionun nəqliyyat və enerji dəhlizi kimi Avropa və Asiyanın birləşdirilməsində mühüm rol oynadığını və ölkəsinin burada təhlükəsizliyə tərəfdar olduğunu, həyata keçirilən regional layihələrə dəstək verdiyini vurğulayıb.

Enerji, nəqliyyat, iqtisadi layihələrin, xüsusilə də planlaşdırılan "Nabucco" layihəsinin Qafqazın təhlükəsizliyində rolu, enerji təhlükəsizliyi, digər ölkələrlə münasibətlər, Türkiyənin sərhədlərin açılması siyasəti, geosiyasi maraqlar və s. barədə müzakirələr aparılıb.

Jurnalistlərlə söhbətində hərbi ekspert Rocer Kanqas bildirib ki, ABŞ və NATO yüklərinin Cənubi Qafqaz-Xəzər dənizi dəhlizindən keçməklə Əfqanıstana ötürülməsi bölgədə müəyyən gərginlik yarada bilər.

Ekspert hesab edir ki, Əfqanıstana və digər ölkələrə yükdaşımalar digər ölkələr tərəfindən hansısa gərginlik və problemlərlə qarşılana bilər: "Biz bu məsələ ilə bağlı Gürcüstan, Qazaxıstan və digər ölkələrlə də müzakirələr aparırıq. Ola bilsin ki, hansısa digər ölkə buna əks mövqedə olsun. Amma düşünürəm ki, ikitərəfli müzakirələrdə razılıq əldə olunacaq".

R.Kanqasın sözlərinə görə, yüklərin daşınması ilə bağlı məsələ Azərbaycan hökuməti və ABŞ arasında ikitərəfli müqavilə əsasında həyata keçiriləcək.

Amerikalı ekspertin fikrincə, ABŞ və NATO yüklərinin bu dəhlizlə ötürülməsi regionda münaqişələrə səbəb ola bilməz.

Ekspert silahlı qüvvələr sistemində mülki heyətin sayının artırılması məsələsindən də danışıb. R.Kanqas bildirib ki, bir sıra ölkələr silahlı qüvvələr strukturunda islahatlar aparır və orada bəzi vəzifələrdə hərbçiləri mülki şəxslərlə əvəz edir: "Bizim ölkədə də belə bir təcrübə mövcuddur. Mən on ildən çox hərbi akademiyada islahatlar sahəsində çalışmışam. Müəyyən vəzifələrin mülki şəxslərlə əvəzlənməsi ABŞ-da tətbiq olunur və çox müsbət təsirləri var".