Həmsədrlər "yeni" təkliflərlə gəliblər
 |
Amma bu təkliflərin detalları açıqlanmır
Şənbə, 12.12.2009
|
|
Dünən Azərbaycan prezidenti İlham Əliyev ATƏT Minsk Qrupunun həmsədrləri Robert Bradtke (ABŞ), Bernar Fasie (Fransa), Yuri Merzlyakov (Rusiya) və ATƏT-in hazırkı sədrinin xüsusi nümayəndəsi Anjey Kasprşiki qəbul edib. Dövlət başçısının mətbuat xidmətinin məlumatına görə, görüşdə Qarabağ nizamlanmasının hazırkı vəziyyəti və perspektivləri müzakirə olunmuşdur.
"Turan"ın məlumatına görə, bir müddət əvvəl həmsədrlərin nizamlanmanın təməl prinsiplərinin (Madrid prinsipləri) "yenilənmiş variantı"nı tərəflərə təqdim edəcəyi barədə məlumat verilmişdi. Bu variant Ermənistan və Azərbaycan prezidentlərinin sonuncu Münhen görüşündə razılaşdırılmışdı.
Belə ki, həmsədrlər budəfəki səfər zamanı Ermənistana getməyəcəklər. Bunun səbəbi Ermənistan rəhbərliyinin ölkədə olmaması göstərilir. Vasitəçilərin Ermənistana səfəri bir müddət sonra baş tutacaq.
Xatırladaq ki, təməl prinsiplər tərəflərə 2007-ci ilin payızında təklif edilib və Qarabağ ətrafında işğal edilmiş ərazilərin azad edilməsini, qaçqınların öz yurdlarına qaytarılmasını və referendum yolu ilə Qarabağın statusunun müəyyən edilməsini nəzərdə tutur. Sonuncu bənd daha çox mübahisə və suallar doğurub. Azərbaycan Qarabağda referendum keçirilməsinin əleyhinədir, Ermənistan isə, əksinə, bunda israr edir. Təməl prinsiplərin yenilənmiş variantının nədən ibarət olduğu isə hələlik aydın deyil.
Xəbərə görə, həmsədrlər Bakı səfərlərinin nəticələrinə dair bəyanatla çıxış ediblər. Onlar prezident İlham Əliyevlə prezidentlərin noyabrın 22-də Münhendə baş tutmuş görüşünün detallarını müzakirə ediblər. Yanvarda isə həmsədrlər rəsmi Bakı ilə apardıqları diskussiyanı Yerevanda davam etdirəcəklər. Bu görüşlərin nəticəsi olaraq yeni ilin əvvəllərində prezidentlərin növbəti görüşü də proqnozlaşdırılır.
|
|
|
Oxşar xəbərlər:
Səfirlərin Xankəndi-İrəvan-Bakı turnesi
Qarabağla bağlı forum keçirilib
Vasitəçilər sülhün uzaqda olmadığını söylədilər
Prezidentlərin Kişinyov görüşünə hazırlıq gedir
Qarabağda yaşayan vətəndaşlarımıza status vermək olar
|
|
|
