Baş nazir Rəcəb Tayyib Ərdoğan bir daha bəyan edib ki, Ermənistanla münasibətlərin normallaşması Dağlıq Qarabağ münaqişəsinin həllindən asılıdır. APA-nın xəbərinə görə, R.T.Ərdoğan "Russian Today" telekanalına müsahibəsində qəbul edilib-edilməyəcəyindən asılı olmayaraq xoşməramlı addım kimi Ermənistana əl uzatdıqlarını deyib: "Lakin Dağlıq Qarabağ problemi, Azərbaycanın işğal olunmuş əraziləri, "dondurulmuş" münaqişə var ki, bunlar ilk növbədə həllini tələb edir. Bu münaqişə həll olunduqdan sonra bölgədə sülh və inkişaf olacaq".
Dekabrın 10-da axşam Serj Sarqsyanla ABŞ dövlət katibi Hillari Klinton arasında telefon danışığı olub. Ermənistan prezidentinin saytında bununla bağlı yerləşdirilmiş informasiyada bildirilir ki, qarşı tərəfin təşəbbüsü ilə baş tutan telefon danışığında Klinton ABŞ prezidenti Obama və Türkiyə baş naziri Ərdoğan arasındakı görüşün detalları haqqında Sarqsyana məlumat verib. Bir daha vurğulayıb ki, ABŞ Ermənistan-Türkiyə münasibətlərinin qeyd-şərtsiz qurulmasını ardıcıl dəstəkləməyə davam edəcək.
Telefon danışığında Dağlıq Qarabağ münaqişəsinin həllinə də toxunulub. H.Klinton ölkəsinin münaqişənin dinc və uzunmüddətli həllinə verdiyi dəstəyi təsdiqləyib. Dövlət katibi onu da əlavə edib ki, ABŞ Dağlıq Qarabağ münaqişəsinin həlli ilə Ermənistan-Türkiyə münasibətlərini ayrı-ayrı proseslər kimi nəzərdən keçirir və hər iki prosesdə tərəqqi bölgədə sülh və sabitliyin möhkəmlənməsinə xidmət göstərəcək.
|
