Gizli deyil ki, 1991-ci ildən bu günə kimi Ermənistan dövlətinin və Dağlıq Qarabağdakı oyuncaq güruhun yaşadılması üçün dünya erməni diaspor təşkilatları, beynəlxalq xristian humanitar yardım mərkəzləri gərəkən maliyyə yardımlarını ediblər. Bununla da hər iki bölgədə müəyyən mənada sosial, iqtisadi və maliyyə problemlərinə yardımçı ola bilirdilər. Bu gün isə həmin iriməbləğli sədəqə və ianə paylarının azaldığını və hətta dayandırıldığını müşahidə edirik. Bu niyə belə olur?

Bəlli olduğu kimi, Ermənistanı o vaxtlardan idarə etmiş çevrələr bütün dünyanı aldadaraq "qüdrətli erməni diasporu", "Güney Qafqazda mübariz xristian dövləti" kimi təbliğatların hesabına maliyyə axınlarına yol açmaq və böyük bir gücə sahib olmaq istəyirdi. Bütün bunlar indi fiaskoya uğrayıb. Çünki regionda strateji hədəfləri olan dövlətlər Azərbaycan və Gürcüstanın siyasi iradəsinə daha çox önəm verməyə məcburdurlar. Bütün bunları yaxşı görən başlıca sponsor - erməni diasporunun bizim Qafqaz regionuna olan ənənəvi marağını azaltdığına təbii baxmaq lazımdır. Ermənistan və Dağlıq Qarabağın yaşadılması üçün dünya ermənilərinin topladıqları ianələrin azaldığı bunu təsdiq edir.

Geneoloji problemlər "Böyük Ermənistan" siyasətini uçuruma yuvarladıb

Ermənilərin bir millət olaraq genetikasında müxtəlif toplumların birləşməsi haqqında tarixçilər çox zaman susmağa üstünlük veriblər. Belə ki, Orta Şərq, Ön Asiya və Qafqazda bir sıra toplumların protoxristian və digər mədəniyyətlərin daşıyıcıları olması, dini kimlik məsələsində ermənilərlə yaxınlıqları sayəsində tarixin müəyyən çağında "erməniləşib"lər. Bu sırada saami bartanq, kəldani və yezidi kürdlər, frigiya, arami, xristian suriyalılar, xristian farslar, xristian əndəluslar, luvi, xristian türklər, xristian çərkəzlər (abaza, kabarda, abxaz), gürcülər (svan), xaldey, stepanminstlər, xristian ərəblər, xet, xurrit, ispan baskları, fransız baskları, yunan, berzen, yəhudi və xristian darginlər, xristian ləzgilər və digərlərinin erməniləşmələri buna örnəkdir. Bu barədə ətraflı tədqiqatlar aparmış məşhur tarixçi V.A.Şnirelman "Arizm və ermənilər" əsərində qeyd edir: "Ermənilərin mənşəyində Hind-Avropa və sami xalqlarının genetik ünsürləri bir-birinə o qədər qarışıb ki, onların mənşəyində iştirak edən toplumları müəyyənləşdirmək çox çətindir. Ermənilər arasında etnik müxtəlifliyi onların həyat tərzində müşahidə etməklə dəqiqləşdirmək mümkündür. Buna görə də erməni kilsəsi bütün gücü ilə çalışır ki, ermənilər arasında müxtəlifliyi qapalı saxlasın və gizli formada bunun izlərini itirsin".

Erməni akademikləri Y.A.Manandyan, V.N.Arakelyan və professor S.T.Yeremyan "Ermənilərin coğrafi miqrasiya və etnogenezisi" kitabında qeyd edirlər: "Tarix boyu miqrasiya həyat şəraitində yaşamaq ermənilərin müxtəlif etnik qruplarla qaynayıb-qarışmalarına səbəb olmaqla yanaşı, həm də erməni etnosunun çoxçalarlı genezisə malik mədəniyyət qatlarına səbəb olub. Erməni tarixçiləri "hayas" hipotezinə uyğunlaşdırılan və kilsə tərəfindən xüsusi nəzarətdə saxlanılan ümumerməni dəyərlərini inkişaf etdirməyə çalışsalar da, hələ ki buna tam nail ola bilməyiblər. Çünki fərqli etnosların dil və kilsə baxımdan erməniləşməsi hələ genezisin tam dəyişməsinə səbəb ola bilməyib".