Klassik ifası ilə seçilən xanəndə, Azərbaycan Dövlət Muğam Teatrının solisti Sahib İbrahimov son günlər medianın diqqətindədir. Bu günlərdə yeni albomu və onun televiziya variantı ilə gündəmə gələn müğənni adının qalmaqallarda hallandırılmasından ehtiyat edir.
Maqazin verilişlərindən bu səbəbdən uzaq gəzdiyini bildirən sənətçi bu dəfə də yaradıcılığı barədə danışmaq istədi. Dedi ki, növbəti layihələrdə müasir və sanballı estrada musiqilərinə də müraciət etməyi nəzərdə tutur. Xanəndə deyir ki, bu, dinləyici zövqünü oxşamaq məqsədi daşıyır. Bu niyyətlə bir sıra peşəkar bəstəkarlarla çalışmağı nəzərdə tutan müğənninin yeni repertuarının təqdimatı uzun çəkməz.
Sənətə təsadüfi gəlmədiyini vurğulayan Sahib İbrahimov öz sənət keçmişi barədə də bir qədər danışdı. Söylədi ki, Asəf Zeynallı adına Musiqi Məktəbini bitirib və xalq artisti Canəli Əkbərovun tələbəsi olub. Bir müddət Rəşid Behbudov adına Mahnı Teatrında çalışan sənətçi daha sonralar yolunu Azərbaycan Dövlət Muğam Teatrından salıb və uzun müddətdir orada çalışır. Hazırda isə Sahib İbrahimov Bülbül adına Musiqi Məktəbində pedaqoji işdədir.
|
