Xəbər verdiyimiz kimi, voleybol üzrə Avropa miqyaslı klub turnirlərində ölkəmizi 5 komanda təmsil edir. Kişi voleybolçuların turnirində "Azərneft", qadın voleybolçuların yarışında isə "Azərreyl", "Rabitəçi", "Lokomotiv" və "İqtisadçı" komandaları mübarizə aparır. Artıq ilk mərhələnin oyunları başa çatıb. Son bir neçə gündə Bakıda yaşanan voleybol həyəcanından sonra komandalarımızdan dördü Avrokuboklarda mübarizəni davam etdirəcək. Bunlar kişilərdən ibarət "Azərneft" və qadınlardan ibarət "Azərreyl", "Lokomotiv" və "Rabitəçi" klublarıdır.

"Azərreyl" və "Rabitəçi" nüfuzuna görə qitənin ikinci klub turniri sayılan Avropa Voleybol Konfederasiyasının (CEV) kuboku uğrunda mübarizə aparırlar.

"Rabitəçi"nin yarışa uğurla başlaması haqqında xəbər vermişdik. Xatırladaq ki, dekabrın ilk günlərində Polşada yerli "Vımpel Qvardiya" klubunu 3:1 hesabı ilə məğlub edən "Rabitəçi" cavab görüşündə rəqibinə eyni hesabla qalib gələrək, yarışın 1/8 finalına çıxıb. Bakılılar baş mükafat uğrunda mübarizəni davam etdirmək üçün növbəti mərhələdə Fransanın "Roşevil" (Kann) komandasını məğlub etməlidirlər. İlk görüş 2010-cu il 5-7 yanvar aralığında Fransada, cavab matçı isə 12-14 yanvar aralığında Bakıda keçiriləcək.

Ölkəmizin ən titullu klubu "Azərreyl" də uğurla çıxış edir. Avstriyanın "SVS Rost Şveşat" klubunu ilk görüşdə 3:2 hesabı ilə məğlub edən voleybolçularımız Bakıda 3:0 hesabı ilə təkrar qələbə qazanaraq, 1/8 finala yüksəlib. Komandamız növbəti mərhələdə Türkiyənin güclü "Əczaçıbaşı" komandası ilə qarşılaşacaq. İlk oyun 2010-cu il 5-7 yanvar aralığında paytaxtımızda, cavab görüşü isə bundan bir həftə sonra İstanbulda olacaq.

Nüfuzuna görə nisbətən zəif sayılan "Çağırış kuboku"nda mübarizə aparan qadınlardan ibarət "İqtisadçı"nın ilk oyunda İstanbul "Qalatasaray"ına 0:3 hesabı ilə uduzduğunu yazmışdıq. Təəssüf ki, Bakıda keçirilən təkrar görüşdə doğma meydança amili də xanım voleybolçularımızın köməyinə yetməyib. İlk matçda qeydə alınan "təmiz qələbə" cavab matçında da təkrar olunub və "İqtisadçı" mübarizəni dayandırıb.

"İqtisadçı"dan fərqli olaraq "Çağırış kuboku"nda çıxış edən digər klubumuz "Lokomotiv" cavab oyununda səfərdə 2:3 hesabı ilə uduzduqları İsrailin "RAANANA" klubundan üstün olublar. "Lokomotiv" doğma meydanda keçirilən oyunda rəqibinə heç bir şans verməyib - 3:0 (25:19; 25:17; 25:12). Bu nəticə komandamızın növbəti mərhələyə adlaması üçün yetərli olub.

"Çağırış kuboku"nda çıxış edən kişilərdən ibarət "Azərneft" klubu voleybolçuları da ilk mərhələdən üzüağ çıxıblar. Səfərdə keçirilən ilk görüşdə Yunanıstanın "Foinikas" klubuna minimal hesabla məğlub olan (3:2) "Azərneft" cavab qarşılaşmasında 3:1 (25:20; 25:23; 19:25; 25:14) hesabı ilə qalib gələrək, növbəti mərhələyə yüksəlib.

"Azərneft" və "Lokomotiv"in növbəti mərhələdə hansı komandalarla üz-üzə gələcəyi yaxın günlərdə məlum olacaq.