Azərbaycan Bəstəkarlar İttifaqının 75 illiyi ilə əlaqədar olaraq, bu ilin iyun ayında tanınmış bəstəkar, əməkdar incəsənət xadimi Azər Dadaşovun fortepiano əsərlərinin ən yaxşı ifaçısı üzrə elan etdiyi müsabiqənin ilk turuna start verilib. Bakı və Sumqayıt şəhərinin uşaq və orta ixtisas musiqi məktəblərinin, musiqi kolleclərinin tələbələrinin iştirak etdiyi müsabiqənin ilk turu dekabrın 15-dən 18-dək keçiriləcək.
Azərbaycanda uşaq, yeniyetmə və gənclər arasında musiqi sənətinə həvəsin artırılması, musiqi zövqünün formalaşması, müasir Azərbaycan bəstəkarlarının uşaqlar üçün yaratdıqları əsərlərin təbliği, fortepiano üzrə təhsil alan şagirdlərin repertuarının yenilənməsi, xüsusi istedada malik uşaq və gənclərin aşkara çıxarılması məqsədilə, yaşı 18-dən böyük olmayan (1991-ci il doğumlu) ifaçılar arasındakı müsabiqə 3 mərhələdən ibarət olacaq.
Bəstəkarlar İttifaqı mətbuat xidmətinin rəhbəri İltifat Hacıxanoğlunun qəzetimizə bildirdiyinə görə, müsabiqənin münsiflər heyəti Bəstəkarlar İttifaqının üzvləri, Bakı Musiqi Akademiyasının professorlarından təşkil ediləcək.
Bu müsabiqənin nəticələri üzrə xüsusi disk buraxılışı nəzərdə tutulub. Topluya müsabiqə qaliblərinin, habelə II mərhələdə fərqlənən iştirakçıların ifasında Azər Dadaşovun fortepiano pyesləri yazılacaq.
Mətbuat əlaqələndiricisi qurumun digər xəbəri barədə də danışıb. O bildirib ki, ötən gün Bəstəkarlar İttifaqının konfrans zalında ümummilli lider Heydər Əliyevin xatirəsinə həsr edilən dəyirmi masa keçirilib. Respublikanın tanınmış musiqi xadimlərinin iştirak etdiyi tədbirdə ümummilli liderin Azərbaycan musiqi mədəniyyətinin inkişafında gördüyü işlərdən söhbət açılıb. Heydər Əliyevlə bağlı xatirələr dinlənib və ona hərs olunan musiqilər səsləndirilib.
|
