Ötən gündən start götürən "Alüminium" IV Beynəlxalq Müasir İncəsənət Biennalı ilə bağlı Bakı Muzey Mərkəzində mətbuat konfransı keçirilib. Mətbuat konfransında çıxış edən Mədəniyyət və Turizm Nazirliyinin təsviri və dekorativ sənət sektorunun müdiri, biennalın direktoru Leyla Axundzadə tədbirlər planından söz açaraq, sərginin dekabrın 18-nə kimi davam edəcəyini bildirdi. Xatırlatdı ki, hər iki ildən bir ənənəvi olaraq təşkil edilən beynəlxalq əhəmiyyətli tədbirin keçirilməsində əsas məqsəd dünyanın müxtəlif ölkələrində müasir incəsənət sahəsində baş verən əsas prosesləri tamaşaçılara təqdim etmək və Azərbaycanda müasir incəsənət növlərinin inkişaf səviyyəsinin və bu sahədə çalışan rəssamların yaradıcılığının təbliğindən ibarətdir: "Biennal artıq dördüncü dəfə təşkil olunur. Bu il təşkil olunan silsilə sərgilərdə 20 ölkədən 50-dək tanınmış müasir incəsənət ustaları, sənətşünaslar, kuratorlar iştirak edir. Bir həftə ərzində Bakı şəhərində, demək olar ki, bütün sərgi salonları və qalereyalarda müxtəlif müasir incəsənət sərgiləri təşkil ediləcək". Tədbirdə çıxış edən Rəssamlar İttifaqının katibi, xalq rəssamı Ağəli İbrahimov isə zaman keçdikcə gizli biliklərin insanlara daha çox məlum olduğunu söyləyib: "Yazıçılar, astroloqlar, filosoflar, geofiziklər müxtəlif mənbələrə istinad edir, müxtəlif arqumentlər gətirərək bizim şüurumuzu təkidlə 2012-ci il tarixinə fiksasiya edir. Bu gün texniki tərəqqi sanki heç bir sərhəd tanımır. Bizim start götürən tədbirimizdə bəzi məqamlar tamaşaçısını sözün yaxşı mənasında təəccübləndirə biləcək".
Sözünün davamında Ağəli İbrahimov Bakı biennalına Böyük Britaniya, Niderland, Finlandiya, Danimarka, Norveç, Fransa, ABŞ, Almaniya, İsveçrə, Sloveniya, Rusiya, Türkiyə, Gürcüstan, Qırğızıstan, Qazaxıstan, Hindistan, Pakistan, Litva və Yaponiyadan 60-dan artıq iştirakçının qatıldığını açıqlayıb. Azərbaycandan isə tədbirdə 35 rəssam iştirak edir. İttifaq katibinin sözlərinə görə, biennal keçirilən ərəfədə müasir incəsənət problemlərinə həsr olunmuş "Çərçivələrdən kənar" adlı kitabın təqdimatı da keçiriləcək.
|
