Son zamanlar Azərbaycanda intihar hallarının "cavanlaşması" prosesi gedir. 2009-cu ildə uşaqların intiharı ilə bağlı 29 fakt qeydə alınıb ki, bu da ötən illə müqayisədə 30 faiz çoxdur. Bu fikirlər dünən Uşaq Hüquqları Klinikası və "Hüquq Dünyası Hüquqi Təbliğat" İctimai Birliyinin birgə təşkilatçılığı ilə "Uşaqların intihar etməsinə səbəb olan hallar və mövcud durum" mövzusunda təşkil olunmuş "dəyirmi masa"da səslənib.
Daxili işlər, təhsil, səhiyyə nazirliklərinin, İnsan Hüquqları üzrə müvəkkilin (ombudsman), Ailə, Qadın və Uşaq Problemləri üzrə Dövlət Komitəsinin, QHT-lərin və beynəlxalq təşkilatların nümayəndələrinin iştirakı ilə keçirilən tədbirdə birlik sədri N.Quliyev bildirib ki, ölkədə intihar hallarının "cavanlaşması" prosesi gedir, 2009-cu ildə uşaqların intiharı ilə bağlı 29 fakt qeydə alınıb ki, bu da ötən illə müqayisədə 30 faiz çoxdur. Onun sözlərinə görə, bu rəqəm 18 yaşınadək olan şəxsləri ehtiva edir. Cari ildə uşaqların intiharı hallarının artdığını qeyd edən natiq bu rəqəmin 2008-ci ildə 20 nəfər olduğunu xatırladıb: "2009-cu ilin sentyabr ayında intihar edən uşaqların sayı 3, oktyabr ayında 2 və noyabr ayında 4 nəfər olmuşdur".
Uşaq intiharı ilə bağlı rəsmi statistik məlumatların əldə edilməsinin mümkünsüz olduğunu qeyd edən natiq səsləndirdiyi rəqəmlərin yalnız KİV-lərdə gündəlik gedən informasiyalardan əldə etdiyini qeyd edib. N.Quliyev intihar edən uşaqlarla bağlı əldə olunan məlumatların və bu sahədə aparılan araşdırmaların nəticələrinin BMT Uşaq Hüquqları Komitəsinə Uşaq Hüquqları üzrə QHT Alyansı tərəfindən hazırlanan alternativ hesabatda yer alacağını da bildirib.
Uşaq intiharının səbəblərini açıqlayan psixoloq Asəf Kərimov əsas səbəblər kimi uşaqların psixoloji durumu, uşaqların zorakılığa məruz qalması və valideynlər tərəfindən uşaqlara həssaslıqla yanaşılmadığını göstərir: "Araşdırmalar göstərir ki, hazırda uşaqların psixoloji xidmətlərdən istifadəsində bir çox problemlər mövcuddur. Eyni zamanda, valideyn-məktəb əməkdaşlığı çox zəifdir. Uşaqların mobil telefondan, internetdən və zorakılığı təbliğ edən oyunlardan istifadə etməsi onların psixoloji durumuna çox mənfi təsir göstərir". Psixoloq intihar hallarının azaldılması üçün geniş maarifləndirmə işi aparılmasına və uşaqlara göstərilən psixoloji yardımın gücləndirilməsinə böyük ehtiyac olduğunu deyir.
DİN Yetkinlik yaşına çatmayanlarla profilaktik işin təşkili şöbəsinin əməkdaşı Ruslan Rəsulbəyli bildirib ki, uşaq intiharları halları daha çox rayonlarda baş verir.
Ombudsman Aparatının əməkdaşı Zaur Zamanov isə intihar edən uşaqların çoxunun zorakılığa məruz qalanlar olduğunu diqqət mərkəzinə çatdırıb. Uşaqları intiharlardan çəkindirmək üçün istər orta məktəblərdə, istərsə də ailələrdə psixoloqdan bəhrələnməyin vacibliyini önə çəkən Z.Zamanovun fikrincə, məktəblərdə sosial işçilər institutunun formalaşdırılması uşaq intiharının azaldılmasına ciddi təsir edə bilər.
Ailə, Qadın və Uşaq Problemləri üzrə Dövlət Komitəsinin baş məsləhətçisi Aydın Rəcəbli isə intihar hallarının artmasının daha çox valideyn-uşaq münasibətləri ilə bağlılığını vurğulayıb. Azyaşlıların intihar hallarının aradan qaldırılması istiqamətində təkliflərini açıqlayan A.Rəcəbli bildirib ki, televiziyalarda uşaqları bu kimi hallara sövq edə biləcək süjetlər ya göstərilməməli, ya da gecə saatlarında göstərilməlidir.
Azərbaycan Milli Valideyn-Müəllim Assosiasiyasının icraçı direktoru Təranə Şərifova isə bildirib ki, intihar hallarına görə əsas risk qrupuna uğursuz ailələrdə olan uşaqlar daxildir. T.Şərifova eyni zamanda, intihar edən uşaqlar arasında nümunəvi uşaqların çoxluq təşkil etməsini bu kimi uşaqların özünə qapalı olmaları ilə izah edir.
|
