Ölkənin indiki inkişaf mərhələsində hüquq elmlərini inkişaf etdirmək və günün tələbləri səviyyəsinə gətirmək zərurəti gündəmdədir. Bəlli olduğu kimi, elmin inkişafı üzrə Milli Strategiyanın və Dövlət Proqramının icrası ilə əlaqədar avqustda hüquqşünas alimlərdən ibarət İşçi Qrupu yaradılmış və Qrupa rəhbərlik hüquq elmləri doktoru, professor, BDU-nun kafedra müdiri Kamil Səlimova həvalə edilmişdir.
BDU-nun hüquq fakültəsinin dosenti, İşçi Qrupunun katibi Mirəli Kazımovun bildirdiyinə görə, cari ilin noyabr ayının 21-də respublika prezidenti yanında Dövlət İdarəçilik Akademiyasında Prezident Administrasiyasının rəhbəri, akademik Ramiz Mehdiyevin sədrliyi ilə MEA prezidentinin, AAK-nın sədri Arif Mehdiyevin, habelə ölkədə ictimai və humanitar elmlərlə məşğul olan alim, müəllim, elm və təhsil ocaqlarının rəhbərlərinin və təhsil nazirinin iştirakı ilə müşavirədə Ramiz Mehdiyev Milli Elmlər Akademiyasının strukturları ilə bağlı institutlar və ali təhsil məktəblərinin müvafiq qurumlarının ictimai və humanitar elmlərlə bağlı öz inkişaf konsepsiyasını və fəaliyyət proqramını altı ay ərzində Elmin İnkişafı Fonduna təqdim etmələrini tapşırmışdı.
Mirəli Kazımov bildirir ki, dövlət başçısının elmin inkişafına göstərdiyi diqqət humanitar və ictimai elm sahələrində, o cümlədən hüquq elmləri sahəsində yeni canlanma yaratmışdır.
Azərbaycan Milli Elmlər Akademiyası tərəfindən yaradılmış İşçi Qrupu hüquq elmlərinin müxtəlif sahələrinin problem məsələlərinin elmi-nəzəri cəhətdən öyrənilməsini, mövcud problemlərin hüquqi vasitələrlə aradan qaldırılmasını təmin etmək üçün normativ hüquqi bazanın təkmilləşdirilməsi, ölkə həyatında və dövlət idarəçiliyində hüquqşünasların və hüquq elminin rolunun artırılması, mövcud qanunların beynəlxalq hüquq normalarına uyğunlaşdırılması və cəmiyyətdə gedən sosial, siyasi, iqtisadi və hüquqi proseslərin tənzimlənməsinin mükəmməl həyata keçirilməsi kimi funksional vəzifələrin yerinə yetirilməsi istiqamətində böyük səylə fəaliyyətə başlamışdır.
İşçi Qrupu tərəfindən hüquq elminin inkişafına xidmət edən vəzifələrin yerinə yetirilməsi məqsədilə elmi, nəzəri və praktiki təkliflərin verilməsi üçün hüquqşünasların fəaliyyət göstərdiyi dövlət orqanlarına, qeyri-dövlət qurumlarına, elm və təhsil ocaqlarına, habelə müstəqil ekspertlərə məktublarla müraciət olunmuşdur.
Yaxın gələcəkdə keçirilməsi nəzərdə tutulan "Hüquq elmlərinin prioritet istiqamətləri və hüquqşünas alimlərin qarşısında duran vəzifələr" mövzusunda Konfrans İşçi Qrupunun funksional vəzifələrinin yerinə yetirilməsində mühüm addım olmaqla, hüquq elminin inkişafına dair irəli sürülən təkliflərin dəyərinin masa ətrafında müzakirəsinə və qarşılıqlı fikir mübadiləsinə əlverişli şərait yaradacaqdır.
|
