Azərbaycanın tanınmış iş adamı, "Şərur" MTK-nın prezidenti İsfəndiyar Axundovu ölümlə hədələyərək ondan külli miqdarda pul tələb ediblər. Bu barədə APA-ya Binəqədi rayon Polis İdarəsindən məlumat verilib.

Məlumatda bildirilir ki, "Şərur" MTK-nın prezidenti İsfəndiyar Axundov Binəqədi rayon Polis İdarəsinə ərizə ilə müraciət edib. İş adamı ərizəsində Bakı şəhərində yerləşən "Ramin" şadlıq evinin sahibi Böyükxan Fərəcəliyev tərəfindən ölümlə hədələndiyini bildirib. İsfəndiyar Axundov qeyd edib ki, Böyükxan Fərəcəliyev onun iş yerinə gələrək külli miqdarda pul tələb edib, istədiyi məbləği verməyəcəyi təqdirdə isə onu öldürəcəyi ilə hədələyib.

Faktla bağlı artıq Binəqədi rayon Polis İdarəsi tərəfindən araşdırmalara başlanıb. Hazırda polis Böyükxan Fərəcəliyevin saxlanması üçün onun barəsində axtarış elan edib.