İzzət Bağırov repertuarında türk mahnılarını seyrəltməyə qərar verib. Müğənni bu qənaətə gəlib ki, onlara çox az hallarda yer ayırsın. Bu səbəbsiz deyil. Müğənni deyir ki, vaxtilə sevərək ifa etdiyi türk mahnıları bu gün onu özündən uzaqlaşdırır. Müğənni deyir ki, təşrif buyurduğu məclislərdə yerli müğənnilərin ifasında eşitdiyi türk mahnıları onu bu seçimdən bir qədər uzaqlaşmağa məcbur edib: "Söhbət həmkarlarımın niyə türk mahnılarına müraciət etməsindən getmir. Türk mahnılarının ilk ifaçılarından biri də mən olmuşam və bu günə qədər repertuarımdan əskik deyil. Məsələ bundadır ki, bir mahnı çox məşhur olanda onu hamı oxumağa can atır. Hansı məclisə daxil olursan, eyni mahnını müxtəlif yanaşmalarda eşidirsən. Yəni bacaran da oxuyur, bacarmayan da. Məni narahat edən budur. Aleksandr Rıbakın "Eurovision"da ifa etdiyi mahnını, demək olar ki, əksər müğənnilər ifa edir. Mən mənə yaraşan mahnını ifa edirəm. Tamaşaçı zövqünü məşhur mahnılarla deyil, özümə yaraşan ifalarla oxşamağa çalışıram".
Müğənnini narahat edən başqa səbəblər də var. Son illər ölkədə bir-birinin bəhsinə yaradılan prodüser şirkətlərinin əcnəbi sənətçilər üçün təşkil etdiyi konsertlər yerli müğənnilərin heç də ürəyincə deyil. Belə ki, İzzət Bağırovla yanaşı bir neçə müğənni var ki, onlar təşkilatçıların məhz əcnəbilərin konsertinə maraq göstərməsindən gileylənirlər. İzzət Bağırova gəlincə, konsert vermək həvəsinin öldüyünü deyir və bunu yuxarıda göstərilən səbəblə izah edir: "Bizim əksər müğənnilərin səs imkanları bəzi dünya ulduzlarının imkanlarından heç də geri qalmır, hətta deyərdim, yüksəkdir. Sadəcə, biz əcnəbilər qədər yüksək yaradıcılıq təklifləri almırıq. Hərdən deyirlər ki, filankəs gəlib Bakıda yüksək şou nümayiş etdirdi. Şou nəyə deyirik? Əgər mənim və ya konsertimi təşkil edən təşkilatçının kifayət qədər pulumuz olsa, biz də həmin şounu göstərə bilərik. Xaricdə səhnə tələbatını ödəyə biləcək elementlər gətirməklə bunu təşkil etmək olar. Çünki bir az əvvəl qeyd etdiyim kimi, səs imkanlarımız var və maddiyyat və bir qədər də diqqətsizlik bunu həyata keçirməyə imkan vermir".
Bununla yanaşı, İzzət Bağırov yaxın gələcək üçün konsert verməyi planlaşdırır. Hazırda bir neçə yeni mahnı üzərində çalışan sənətçinin növbəti hazırlığı, çox güman ki, konsert barəsində olacaq.
|
