Xəbər verdiyimiz kimi, bu il voleybol üzrə Avropamiqyaslı klub turnirlərində Azərbaycanı 5 komanda təmsil edir. Kişi voleybolçuların turnirində "Lokomotiv" və "Azərneft" klubları, qadın voleybolçuların yarışında isə "Azərreyl", "Rabitəçi" və "İqtisadçı" komandaları mübarizə aparır. Püşkün nəticəsinə əsasən, komandalarımız ilk matçlarını rəqib meydanında keçiriblər.
Avropa Voleybol Konfederasiyasının (CEV) kuboku uğrunda mübarizə aparan "Rabitəçi" yarışa uğurla başlayıb. Komandamız Polşada yerli "Vımpel Qvardiya" klubunu məğlub edib - 3:1. Vrotslav şəhərində 950 tamaşaçının izlədiyi matç 96 dəqiqə davam edib. Cavab görüşü dekabrın 10-da Bakıda keçiriləcək. "Rabitəçi"nin ardınca daha 3 klubumuz mübarizəyə qoşulub. "Çağırış" kubokunun ikinci mərhələsindən mübarizəyə başlayan qadın voleybolçulardan ibarət "İqtisadçı" klubu ilk oyunda məğlubiyyətlə barışıb. Həmyerlilərimiz "İstanbul"da "Qalatasaray"a 0:3 hesabı ilə uduzublar. Voleybolçularımız cəmi 1 saat 4 dəqiqəyə təslim olublar və oyun ərzində 48 xal toplayıblar.
"Çağırış" kubokunda mübarizə aparan digər komandalarımız da məğlibiyyətin acısını yaşayıblar. Lakin "İqtisadçı"dan fərqli olaraq, kişilərdən ibarət "Lokomotiv" və "Azərneft" səfərdə rəqibə ciddi müqavimət göstəriblər. "Lokomotiv" İsraildə yerli "RAANANA" komandasına məğlub olub - 2:3. "Azərneft" isə eyni hesabla Yunanıstanda yerli "Fainikas" klubuna uduzub - 2:3. Bu klublarımız cavab matçına dekabrın 9-da çıxacaqlar.
Avrokuboklarda çıxış edən daha bir təmsilçimiz - "Azərreyl" isə Avropa Voleybol Konfederasiyasının kuboku uğrunda yarışlara yaxşı başlayıb. Ölkəmizin ən titullu komandası Avstriyanın "SVS Rost Şveşat" klubu ilə ilk matçda qələbə qazanıb - 3:2. "Azərreyl" cavab qarşılaşmasını dekabrın 8-də keçirəcək.
|
