Büdcə dəyişdirilib qəbul edildi

Dünən Milli Məclis "Azərbaycan Respublikasının 2010-cu ilin dövlət büdcəsi haqqında" qanun layihəsini təsdiqlədi. Layihəni təqdim etmək, həm də sənədə edilən dəyişikliklər barədə deputatlara məlumat vermək üçün maliyyə naziri Samir Şərifov çıxış etdi.

Nazirin sözlərinə görə, Milli Məclisin hökumətə verdiyi vaxt ərzində dövlət büdcəsinə yenidən baxılıb və bu zaman deputatların təkliflərindən bəziləri nəzərə alınıb. Hökumətdə aparılan müzakirələr nəticəsində qərara alınıb ki, icmal büdcəsi 20 milyon manat artırılaraq 12 milyard 636 milyon manata çatdırılsın. Belə ki, hökumət Dövlət Neft Fondunun xərclərinin 20 milyon manat artırılmasına qərar verib. Bu vəsait ekoloji problemlərin maliyyələşdirilməsinə sərf olunacaq.

Nazir dedi ki, hökumət bundan əlavə, deputatların təkliflərinə əsasən, dövlət büdcəsinin xərc strukturunda da bəzi dəyişikliklər edib. Bir neçə sahə üzrə nəzərdə tutulan vəsaitlər artırılıb. Belə ki, elmi-tədqiqat institutlarının fəaliyyətinin yaxşılaşdırılması, müasir avadanlıqlarla təminatının gücləndirilməsi üçün elm xərclərinə əlavə olaraq 3 mln. manat, dərman preparatları ilə təchizatın yaxşılaşdırılması ilə bağlı səhiyyə xərclərinə əlavə olaraq 4 mln. manat, tarixi abidələrin bərpası, xaricdə Azərbaycan mədəniyyət mərkəzləri yaradılması, sənədli filmlər çəkilişi və digər mədəniyyət tədbirlərinin maliyyələşdirilməsi üçün mədəniyyət xərclərinə əlavə olaraq 6,3 mln. manat ayrılıb.

Bundan başqa, Milli Məclisin və Xarici İşlər Nazirliyini

n əməkhaqqı fondunu müvafiq olaraq 458 min və 580 min manat artırmaq məqbul sayılıb. Ümumilikdə, deputatların təklifi ilə ayrı-ayrı sahələr üçün təklif olunan cəmi 14,3 mln. manat vəsaitin 13,3 milyon manatı sosial yönümlü tədbirlərin maliyyələşdirilməsinə yönəldilib. Amma bütün bu dəyişikliklər büdcənin ümumi xərclərini artırmayıb. Nazir dedi ki, digər sahələrə yönəldilən vəsaitlər büdcənin xidmət xərcləri bölməsində valyuta ehtiyatlarının konventarizasiyası üçün nəzərdə tutulan vəsaitlərdən götürülüb. Yəni həmin iş üçün nəzərdə tutulan vəsait 14,3 milyon manat azaldılıb. Bununla da 2010-cu il dövlət büdcəsinin gəlirləri 10 milyard 015 milyon manat, xərcləri isə 11 milyard 264 milyon manat olaraq qalıb.

Dövlət büdcəsinin kəsiri isə 1,249 milyard manat həcmində proqnozlaşdırılır. Bundan sonra dövlət büdcəsi 101 nəfər lehinə, 8 nəfər əleyhinə olmaqla qəbul edildi. İclasda Dövlət Sosial Müdafiə Fondunun (DSMF) büdcəsi də təsdiq edildi. Fondun sədri bildirdi ki, DSMF-nin 2010-cu il büdcəsinin gəlir və xərcləri müvafiq olaraq 1.757,216 mln. manat səviyyəsində müəyyənləşdirildi.

Deputatlar yaşayış minimumunu 87 manat, ehtiyac meyarını isə 65 manat məbləğində təsdiqlədilər.