Dünən Media Mərkəzində Seçkilərin Monitorinqi və Demokratiyanın Tədrisi Mərkəzi (SMDT) "23 dekabr 2009-cu il bələdiyyə seçkilərində namizədlərin irəli sürülməsi və qeydiyyat prosesi ilə bağlı Aralıq Hesabat"ı təqdim edib.
SMDT-nin icraçı direktoru Bəşir Süleymanlının sözlərinə görə, bələdiyyə seçkilərinin uzunmüddətli müşahidəsinin birinci mərhələsi 8 oktyabr - 24 noyabr tarixlərini əhatə edir. Onun sözlərinə görə, SMDT 96 seçki dairəsində seçkiqabağı siyasi mühiti, seçki komissiyalarının fəaliyyəti, namizədlərin irəli sürülməsi və qeydiyyatı prosesini müşahidə edib. Müşahidənin nəticələri onu göstərir ki, ölkədə bələdiyyə seçkilərinin azad və demokratik qaydada keçirilməsi üçün normal şərait təmin edilməyib. Belə ki, bələdiyyə seçkiləri ərəfəsində sərbəst toplaşmaq azadlığı, siyasi fəaliyyət imkanları, söz və mətbuat azadlığına təminatla bağlı vəziyyət dəyişilməyib. Süleymanlı qeyd edib ki, builki bələdiyyə seçkilərinin ilk mərhələsində siyasi fəallıq və seçkilərə maraq 2004-cü ildə keçirilmiş bələdiyyə seçkiləri ilə müqayisədə "xeyli aşağıda olub".
Səciyyəvi pozuntular olaraq, Süleymanlı icra hakimiyyəti orqanlarının seçkilərdə iştirak etmək istəyini bildirən müxalifət partiyalarının fəallarına təzyiqlərini qeyd edib. Belə faktlar daha çox Neftçala, Ağcabədi, Şəmkir, Beyləqan seçki dairələrində qeydə alınıb.
Süleymanlı həmçinin MSK-nın bəzi hallarda seçki kampaniyası zamanı pozuntular haqqında şikayətləri araşdırmaqdan imtina etdiyini qeyd edib. Misal olaraq, xatırladıb ki, Müsavat Partiyası üzvlərinin Bərdə şəhərində olan təzyiqlərlə bağlı MSK-ya müraciət etməsinə baxmayaraq, MSK ekspertlər qrupu şikayətin onun "səlahiyyətlərinə aid olmadığını" vurğulayıb. Bəzi siyasi təşkilatların bələdiyyə seçkilərində fəal iştirak etmədiyi seçici fəallığına da mənfi təsir edəcək. Seçkiqabağı təşviqat prosesinin son bələdiyyə seçkisi ilə müqayisədə rəqabətsiz şəkildə keçməsi narahatlıq yaradır.
Sonda Süleymanlı bələdiyyə seçkilərinin ilkin mərhələsinin nəticələrinə əsasən, namizədlərin irəli sürülməsi və qeydiyyatı zamanı yol verilmiş qanun pozuntularının araşdırılması, seçki hüququnu pozan bütün şəxslərin, xüsusən də yerli icra strukturları nümayəndələrinin məsuliyyətə cəlb edilməsi və cəzalandırılması zərurətini qeyd edib.
23 dekabr bələdiyyə seçkilərində 1718 yerli özünüidarə orqanında 15.682 yer uğrunda 31.861 namizəd mübarizə aparacaq. Bunun 15.388 nəfəri hakim "Yeni Azərbaycan" Partiyası tərəfindən rəsmi olaraq irəli sürülmüş namizədlərdir.
|
