2005-ci ildə siyasi məhbus məsələsinin araşdırılması üçün hakimiyyətin hüquq müdafiəçiləri ilə birgə yaratdığı İşçi Qrup dağılıb. Bunu "Ayna"ya İşçi Qrupun üzvü olan hüquq müdafiəçisi Səidə Qocamanlı danışdı.

"İşçi Qrupun fəaliyyət göstərdiyi ilyarım ərzində 77 siyasi məhbus azadlığa buraxılıb. İşçi Qrupun xeyri ondan ibarət idi ki, biz orada dövlət strukturlarının nümayəndələri ilə bir yerdə bir sıra məsələləri çözə bilirdik. İşçi Qrupda konstruktiv dialoq yaranmışdı. Çox təəssüf ki, həm iqtidarda olan bəzi məmurların, həm də bəzi müxalifət partiyalarının əli ilə bu qrup dağıdıldı", - deyə S. Qocamanlı təəssüflə qeyd etdi.

"Bizə yönələn əsas ittiham ondan ibarətdi ki, biz siyasi məhbuslar üzrə yeni məruzəçinin təyin edilməsinə qarşıyıq. Çünki biz bilirdik ki, yeni məruzəçi heç nə edə bilməyəcək. Vaxt bizim haqlı olduğumuzu göstərdi. Artıq bir ildir yeni məruzəçi təyin edilib, amma indiyə qədər Azərbaycana nə gəlib, nə də problemlə maraqlanıb. Siyasi məhbus məsələsi havadan asılı vəziyyətdə qalıb".

İşçi Qrupun tərkibinə Prezident Administrasiyası işçiləri, Milli Məclisin deputatları, Aərbaycanın Avropa Şurasındakı heyətinin üzvləri, baş prokurorluq, Ədliyyə Nazirliyinin işçiləri və hüquq müdafiəçləri daxil idi. İşçi Qrup yaranan zaman siyasi məhbus məsələsinin araşdırılacağı ilə bağlı birgə memorandum da imzalanıb Avropa Şurasına göndərilmişdi.

Hüquq müdafiəçilərinin hazırda işlədikləri əsas şəxs AŞ İnsan Hüquqları Komissarı Tomas Hammerberqdir.

"Siyasi məhbus" məsələsi Azərbaycanın başı üstündə asılmış "Domokl qılıncı" kimidir" - Səidə Qocamanlı belə deyir. Hüquq müdafiəçisi qeyd etdi ki, bu günə qədər Avropa Şurası qarşısında ən vacib öhdəlik olan bu məsələ öz həllini tapmayıb.

"Hazırda Hüqüq Müdafiə Təşkilatlarının Monitorinq Qrupunun siyahısında 25 siyasi məhbus var. Burada ən utanc gətirən fakt isə jurnalistlərin adlarının olmasıdır.

Hüquq müdafiəçiləri hazırda ömürlük həbs cəzasına məhkum edilənlərin cəzalarının 15 ilə endirilməsi ilə bağlı məsələ üzərində işləyirlər. S. Qocamanlının sözlərinə görə, onların əksəriyyəti xəstədir. "Biz hazırda bu məsələnin Avropa Şurası səviyyəsində həlli ilə məşğuluq. Çox güman ki, qurumun 2010-cu ilin yanvar ayındakı sessiyasında bu problemə toxunulacaq. Bununla bağlı dövlətin rəsmi strukturlarına da müraciət etmişik. Hələlik məsələ müzakirə səviyyəsindədir".

S.Qocamanlı həmçinin qeyd etdi ki, bu ilin sonuna yeni əfv fərmanı gözlənir. O deyir: "Amma bu siyahıya bizim siyasi məhbus saydığımız şəxslərin salınıb-salınmayacağını deyə bilmərəm".