Azərbaycan prezidenti İlham Əliyev Qurban bayramı münasibətilə Azərbaycan xalqına təbrik ünvanlayıb. Prezidentin mətbuat xidmətindən verilən məlumata görə, İ.Əliyev Azərbaycan xalqını, dünyanın müxtəlif guşələrində yaşayan bütün soydaşlarımızı ürəkdən təbrik edib, ən səmimi arzu və diləklərini yetirib.
Təbrikdə qeyd olunur ki, islamın bir din kimi tanınması, mənəvi-əxlaqi qurtuluş yolu olaraq bəşəriyyətə göndərilməsini özündə təcəssüm etdirən mübarək Qurban bayramı insanları mərhəmətə, həmrəyliyə, qardaşlıq və humanizmə dəvət edən bir bayramdır: "Bu əziz gündə müsəlmanlar Allah və din yolunda, xeyirxah amallar uğrunda hər cür fədakarlığa hazır olduqlarını nümayiş etdirir, uca Tanrıya yaxınlığın fərəhini yaşamaq fürsəti əldə edirlər".
İ.Əliyev təbrikində vurğulayıb ki, Azərbaycan müsəlman dünyasının ayrılmaz parçasıdır və tarixən islam mədəniyyətinin inkişafına misilsiz töhfələr bəxş edib: "Məmnuniyyət hissi ilə qeyd etmək istəyirəm ki, çoxmillətli və çoxkonfessiyalı Azərbaycan cəmiyyətində qarşılıqlı hörmət və etimada əsaslanan nümunəvi birgəyaşayışın, əmin-amanlığın və dözümlülük mühitinin formalaşmasına islam dininin də müstəsna rolu olub".
"Əminəm ki, builki Qurban bayramı da cəmiyyətimizdə milli-mənəvi həmrəyliyin, xeyirxah əməllərin, şəfqət və mərhəmət duyğularının təntənəsinə çevriləcək. Əziz bacı və qardaşlarım! Bu bayram günündə bir daha hər birinizə can sağlığı, ailələrinizə xoşbəxtlik, süfrələrinizə bol ruzi-bərəkət arzulayıram. Qurban bayramınız mübarək olsun!".
ABŞ prezidenti Barak Obama da Azərbaycan xalqına və prezident İlham Əliyevə Qurban bayramı münasibətilə təbrik ünvanlayıb. Təbrikdə deyilir: "Hörmətli cənab prezident! Sizə və Azərbaycan xalqına sevinc dolu müqəddəs Qurban bayramı münasibətilə Amerika xalqı adından ən xoş arzularımı çatdırıram. Ümidvaram ki, bu müqəddəs bayramın ruhuna uyğun olaraq biz bütün dünyada azadlıq və sülhə nail olmaq məqsədilə birgə işləyə bilərik. Sizə və Azərbaycan xalqına gələcək illərdə xoşbəxtlik və firavanlıq arzulayıram!".
|
