"Yeni ulduz" yarışmasından tanınan gənc müğənni Pərviz Mahmudov mahnılarını Müəllif Hüquqları Agentliyində qeydiyyatdan keçirə bilmədiyini deyib. Müğənni bildirib ki, bu səbəbdən o, "mahnısını oğurlayan türkmən həmkarı ilə məhkəmədə hesablaşa bilməyib". Xatırladaq ki, Pərvizin müğənni Sevda Yəhyayevanın ifasında populyarlaşan "O zaman" mahnısını oğurlayıb öz ləhcəsində ifa edən DY Beqa isə azərbaycanlı müəllifin iddia etdiyi bu mahnını "özününkü" kimi təqdim edir.
Pərviz Mahmudov bununla barışmaq istəmir. O deyir:
"Türkmən müğənni onu öz istədiyi şəkildə aranjeman etdirib. Hətta mahnıya klip də çəkilib. Bu xəbər məni çox hirsləndirdi. Mahnını Müəllif Hüquqları Agentliyindən qeydiyyatdan keçirmək istədim. Lakin burada da problemlərlə üzləşdim. Qurumdan mənə dedilər ki, mahnının şəhadətnaməsi olmalıdır. Əslində mahnım artıq albomda var idi. Bu səbəbdən də mahnının məhz özümə aid olduğunu sübut edə bilmişdim. Mən nə qədər çalışdımsa, müəllif olduğumu sübut edə, faktı qanuniləşdirə bilmədim". Müğənni iddia edir ki, digər gənc həmkarları da belə vəziyyətlə üzləşir: "Mənim bir çox gənc həmkarlarım mahnılarını Müəllif Hüquqları Agentliyindən keçirə bilmir. Səbəbi də musiqi savadımızın olmamasıdır. Türkiyədə ən məşhur bəstəkarların musiqi savadları yoxdur (?). Necə olur ki, onlar ən yaxşı bəstəkar kimi qəbul olunur?".
|
