Koreyanın Qyanq şəhərində ağır atletika üzrə dünya çempionatı davam edir. Çempionatda iştirak edən atletlərimizdən heç biri fəxri kürsüyə yüksələ bilməyiblər.

Azərbaycan atletləri arasında körpücük üzərinə ən birinci 62 kq çəkidə çıxış edən Zülfüqar Süleymanov çıxıb. Birdən 133, təkanla 165 kq ağırlıq qaldıran idmançımız 298 kq nəticə ilə 6-cı olub.

Onun ardınca podiuma qalxan Əfqan Bayramov birdən 135, təkanla 170 kq nəticə göstəib. Yekunda 305 kq toplayan atletimiz 10-cu olub. Bu çəkidə yarışmalı olan digər həmyerlimiz Sərdar Həsənov isə çıxış etməyib. 77 kq çəkidə qüvvəsini sınayan Namiq Cəmilov daha zəif çıxış edib. O, ümumilikdə 331 (150+181) qaldıraraq, 31 atlet arasında 15-ci olub.

Dünən daha bir atletimiz qüvvəsini sınayıb. 85 kq-da çıxış edən İntiqam Zairov birdən qaldırmada 170 kq, təkanla qaldırmada isə 203 kq-lıq çəkinin öhdəsindən gəlib. Beləliklə, 373 kq nəticə göstərən İntiqam yarışı 5-ci yerdə başa vurub. Bu, atletlərimizin göstərdiyi nəticələr arasında hələ ki ən yaxşısıdır.

Bu gün Rövşən Fətullayev və Nizami Paşayev (hər ikisi 94 kq), noyabrın 29-da isə Əlibəy Səmədov (105 kq) yarışa qoşulacaqlar.