Futzal üzrə UEFA kubokunun elit raundunun oyunlarına yekun vurulub. Bakıda keçirilən "D" qrupu oyunlarından sonra yarışın final mərhələsində çıxış etmək hüququ verən yeganə vəsiqənin sahibi müəyyənləşib.

Bu yarışda ölkəmizi təmsil edən Azərbaycan çempionu "Araz"ın əvvəlki iki turu qələbə ilə başa vurması haqqında ötən sayımızda məlumat vermişdik.

Əvvəlki iki rəqibinə - Latviyanın "Nikars" və Yunanıstanın "Atina-90" klublarına böyük top fərqi ilə qalib gələn çempionumuz qrupdakı son oyununda Qazaxıstanın "Kayrat" komandasını 4:3 hesabı ilə məğlubiyyətə uğradıb. "Araz"ın heyətində Rodriges Paz (2 qol), Vitali Borisov və Santos fərqləniblər. Beləliklə, elit raundun oyunlarında maksimal nəticə əldə edən komandamız yarışı qrup lideri kimi başa vurub. Ardıcıl üçüncü qələbəsini qazanan Naxçıvan klubu mötəbər turnirin dördlər finalına vəsiqə qazanıb.

Beləliklə, "Araz" qitəmiqyaslı turnirin dördlər finalına çıxan ilk komanda kimi Azərbaycan futzal tarixinə düşüb.

UEFA kubokunda "Araz"ın mübarizə aparacağı növbəti həlledici mərhələnin oyunları 2010-cu ilin aprelində keçiriləcək. Azərbaycan çempionu İtaliyanın "Luparenze", İspaniyanın "İntervyu" və Portuqaliyanın "Benfika" klubları ilə mübarizə aparacaq. Qeyd edək ki, "İntervyu" klubu ötən il UEFA kubokunun qalibi olub.

Yeri gəlmişkən, AFFA futzal üzrə dördlər finalına ev sahibliyi etmək üçün Bakının namizədliyini irəli sürmək niyyətindədir. Püşkatmanın nəticələrinə görə dördlər finalının oyunlarının Bakıda təşkil olunması baş tutarsa, matçların Heydər Əliyev adına İdman-Konsert Kompleksində keçiriləcəyi gözlənilir. Reqlamentə görə, dördlər finalına vəsiqə qazanan hər bir komanda eyni zamanda yarışın bu mərhələsinin oyunlarını öz meydanında keçirmək hüququna da yiyələnir.