Bu gün "Qarabağ" - "Turan" matçı ilə futbol üzrə Azərbaycan çempionatında ikinci dövrə başlanacaq. Növbəti iki gün ərzində daha beş qarşılaşma ilə tura yekun vurulacaq. XII tur: "Bakı" - "Xəzər-Lənkəran", "Simurğ" - "Qəbələ", "Karvan" - "İnter", "Neftçi" - "Olimpik", "Standard" - "Muğan".
İki gün əvvəl keçirilən "Xəzər-Lənkəran"- "Bakı" matçı ilə futbol üzrə Azərbaycan çempionatının ilk dövrəsinə yekun vurulub. 11 turdan sonra çempionatın finalında oynamağa iddialı olan komandalar bəlli olub. Bunlar "İnter", "Simurğ", "Qarabağ", "Qəbələ", "Neftçi", "Xəzər-Lənkəran" və "Bakı"dır. Hərçənd, nəzəri baxımdan turnir cədvəlinin daha aşağı pillələrində qərarlaşan beş komandanın da ilk altılığa düşmək şansı qalıb. İlk dövrənin nəticəsinə əsasən, hazırda "altılıq"da qərarlaşan komandalardan "Xəzər-Lənkəran" və "Qəbələ" daha çox - 8 "qızıl xal" yığıblar. "İnter", "Simurğ" və "Qarabağ"ın aktivində 7, "Neftçi"nin isə 4 xalı var.
Məlum olduğu kimi, cari çempionat fərqli formula üzrə keçirilir. 12 komanda öz aralarında iki dövrə oynadıqdan sonra, hər birində 6 komanda olmaqla, iki qrupa bölünəcək. İlk altılığa düşən komandalar medallar uğrunda, digər altılıqda olanlar isə Premyer Liqada yerini qorumaq üçün mübarizə aparacaqlar. İlk dövrənin son oyunlarından sonra komandalar istirahətə yollanmayacaqlar. Qarşıdakı istirahət günləri çempionatın ikinci dövrəsinin matçları keçiriləcək.
Birinci dövrənin son turunun nəticələri turnir cədvəlində sıxlığın yaranmasına səbəb olub. "İnter" mövsümdə ikinci dəfə məğlubiyyətlə barışıb. Paytaxt komandası ilk dövrəni lider kimi başa vursa da, indi turnir cədvəlində üçhakimiyyətlilikdir. Ötən tur "Simurğ"la "Qarabağ" nisbətən zəif rəqiblərini məğlub edərək, paytaxt klubuna şərik olublar.
İlk dövrənin son oyunu Lənkəranda keçirilib. Xatırladaq ki, "Xəzər-Lənkəran" - "Bakı" matçı sentyabrın 19-da Lənkəranda güclü yağış yağdığından 11-ci dəqiqədə dayandırılmışdı. Odur ki, komandalar bu dəfə cəmi 79 dəqiqə oynamalı olublar. Qarşılaşma qələbə baxımından çox vacib olsa da, matç heç-heçə başa çatıb 1:1.
Son turun nəticələri: "Standard" - "Qəbələ" - 1:2, "Karvan" - "Xəzər-Lənkəran" - 0:2, "Simurğ" - "Turan" - 2:1, "Muğan" - "Bakı" - 0:1, "Neftçi" - "İnter" - 2:1, "Qarabağ" - "Olimpik-Şüvəlan" - 1:0.
Yeri gəlmişkən, bu həftə Premyer Liqada daha bir baş məşqçi dəyişikliyi baş verib. "Olimpik-Şüvəlan" klubunun baş məşqçisi Əsgər Abdullayev vəzifəsindən istefa verib. Onun yerinə Nazim Süleymanov təyin edilib.
|
