Gənc ifaçı Səbinə Babayeva:"Səhnəyə kiminləsə rəqabət aparmağa gəlməmişəm"

Beynəlxalq Müsabiqələr laureatı, gənc ifaçı Səbinə Babayeva ölkəmizin ifa sənətini dəfələrlə beynəlxalq müsabiqələrdə təmsil etmiş və uğurlara imza atmışdır. Əlbəttə, Səbinənin qazandığı uğur kimi, hər bir müvəffəqiyyət ölkəmizin musiqi mədəniyyətinin aktivinə yazılır. Amma onun haqqında, demək olar, heç nə bilmirdik. Görüşümüzdə, təbii ki, sənətçinin özü və sənət uğurlarının təfsilatı barədə danışmasını xahiş etdik.

Səbinə Babayeva Bakı şəhərində, hərbçi və pianoçu ailəsində göz açmışdır. Hələ 10-12 yaşlarında ikən Konservatoriyanın nəzdində fəaliyyət göstərən "Şən notlar" xorunda oxumuşdur. Məktəbi bitirəndən sonra Dağıstan Universitetinin hüquq fakültəsinə qəbul olunub. Amma musiqiyə həvəsi üstün gəlib. Daha sonra burada A.Zeynallı adına Musiqi Texnikumunun vokal sinifinə qəbul olunmuş və bu musiqi təhsili ocağını bitirmişdir.

Səbinə Babayeva danışır:

- 1999-cu ildə musiqi müəssisələri arasında keçirilən "Dalğa", "Xarici mahnının ən yaxşı ifası" nominasiyasında müsabiqənin 1-ci mükafat laureatı olmuşam. Mən həmçinin "Qızıl şlyager 99" adlı Beynəlxalq müsabiqənin 3-cü mükafat laureatıyam. 2000-ci ildə "Diplom for the participation in Charity Concerts dedicated to the İnternational Day İnnocent Children victims of aggeression and UN Programme for the İnternational year of Culture of Peace 2000" aldım.

Daha sonra mən İkinci Dünya müharibəsinin 55-ci ildönümünə həsr olunmuş "Brest 2000" adlı beynəlxalq festivalda ən yaxşı vətənpərvər mahnı ifasına görə 1-ci mükafat laureatı seçildim. 2001-ci ildə "Qızıl açar 2001" Respublika İfaçılar Müsabiqəsində yenə də laureat oldum. Eyni zamanda "Amberstar-2009" beynəlxalq müsabiqəsində Qran-pri sahibi oldum. 2004-cü ildə 10 seriyalı "Bəyaz həyat" filminin soundtrekini ifa etmişəm. Hal-hazırda ÜNS teatrında çalışıram və "Noterdam De Pari" müziklində oxuyuram.

- Bəs sonuncu qalibiyyətiniz barəsində nə deyə bilərsiniz? Bu yaxınlarda beynəlxalq müsabiqədə iştirak edib Qran Pri qazandığınızı öyrəndik...

- İlk Qran-Pri Latviyada keçirilən "Amberstar- 2009" VII Beynəlxalq Televiziya müsabiqəsində idi. Mən "Adajio" kompozisiyasını ifa etdim və "Modern Classic" nominasiyasında qalib gəldim.

REKLAM

Jüriyə Latviya Dövlət Opera Teatrının solisti Eva Vilüma, italyan bəstəkarı və müğənnisi Karlo Kori, Finlandiya Dövlət Televiziyasının prodüseri Tahir Əliyev, Rusiyanın Əməkdar artisti Boris Moiseyev, Rusiyanın əməkdar artisti Nikolay Baskov Latviya Dumasında millət vəkili, mədəniyyət və təhsil komitəsinin üzvü Ruslan Pankratov daxil idi.

Daha sonra mən Turizm və İdman Nazirliyi tərəfindən Kişinyovda keçirilən Gənclər Forumunda iştirak üçün təklif aldım. Orada öyrəndim ki, "Slavyan ulduzu" adlı beynəlxalq müsabiqə var və bu müsabiqədə MDB ölkələri iştirak edir. Müsabiqənin mütləq şərti mahnının rus dilində ifa edilməsidir. Müsabiqə ənənəvi olaraq,

artıq 10-cu dəfə keçirilir, amma Azərbaycan bu müsabiqədə birinci dəfə iştirak edirdi. Mən "31 iyun" adlı filmin soundtrekini yeni orijinal aranjimanda ifa etdim və çox da uğurlu alındı. 26 iştirakçı arasında birinciliyi qazanmağa nail oldum. Onu da mütləq qeyd etmək istəyirəm ki, məni həmkarlarım - Xalq artisti Faiq Ağayev və Aysel Teymurzadə təbrik etdilər.

- Bəs karyeranızın başlanğıcı haqqında nələri söyləyə bilərsiniz?

- Karyeram 1998-ci ildən, yerli və beynəlxalq müsabiqələrdə iştirakımdan başladı. Amma böyük populyarlığı mən "Bəyaz həyat" serialının soundtrekini ifa etdikdən sonra qazandım. Bir ara müəyyən səbəblərə görə Moskvada yaşayıb çalışırdım. Qayıdandan sonra Vaqif Gərayzadənin "Aypara" qrupuna daxil oldum. Əlbəttə ki, Vaqif müəllim qeyri-adi insandır. O, hərtərəfli istedada malik sənət adamıdır və onunla çalışmaq çox maraqlıdır.

- Hazırda nə üzərində çalışırsınız?

- Bir neçə yerli və xarici kompozisiyalar üzərində çalışıram. Onlar aranjiman mərhələsindədir. Amma mən bizim klassikaya, Niyazinin "Arzu" əsərinə, Üzeyir Hacıbəylinin "Sevgili canan" romansına müraciət etmək arzusundayam.

- İşdə hansı prinsipləriniz var? Populyarlığı qazanmaq çətindirmi və musiqi aləmində, sənin ətrafında olan rəqabəti hiss edirsənmi?

- Mənim Anar Nağılbaz, "Dəyirman" qruppu, Röya ilə duetlərim olub. Hər kəsnən çox gözəl münasibətdəyəm. Səhnəyə kiminləsə rəqabət aparmağa gəlməmişəm. Və daha çox populyar olmaq üçün xüsusi planlar cızmıram. Düşünürəm ki, sadəcə, hər şey üçün zaman lazımdır.