Sosial sahədə yeni qanunlara ehtiyac var. Bu zərurəti hiss edən müvafiq qurumlar müxtəlif sənədlər üzərində işləyirlər. Əmək və Əhalinin Sosial Müdafiəsi Nazirliyi "Sosial xidmət haqqında", "Təqaüdlər haqqında" qanun layihələri üzərində işləyir. Nazirliyin yoxsulluq problemləri və ÜSY siyasəti şöbəsinin müdiri Natiq Qasımovun sözlərinə görə, "Sosial xidmət haqqında" qanun günərzi qayğı mərkəzlərinin təşkilinə, bu yöndə nəzərdə tutulan işləri gerçəkləşdirməyə imkan verəcək: "Bu gün tənhalara, ahıllara, qocalara sosial xidmət göstərmək üçün bir qanun mövcuddur. Amma beynəlxalq standartlara uyğun "Sosial xidmət haqqında" qanunun qəbuluna ehtiyac var".
Xidmət növləri isə genişdir. Natiq Qasımovun sözlərinə görə, burada məişət, hüquq, təhsil, reabilitasiya xidmətləri yer ala bilər: "Bu xidmətləri həyata keçirmək üçün müvafiq qurumlar olmalıdır. Hazırda bu istiqamətdə iş aparılır. Qanunun strukturunu artıq yaratmışıq. Mənə elə gəlir qanunu gələn il qəbul edə biləcəyik".
Hazırlanan sənədlərdə uşaqların müdafiəsinə də diqqət yetirilib. "Uşaqların müdafiəsi sahəsində son illər ölkəmizdə çox mühüm işlər görülüb. Bu sahədə bir sıra qanunlar, Nazirlər Kabinetinin qərarları ilə təsdiq olunmuş qaydalar mövcuddur. Bu il "Uşaq ili"dir. 3 ildə görülmüş işlərin başa çatdırılması və konkret addımların atılmasının vaxtı çatıb" - bu sözləri də Natiq Qasımov dedi. Onun sözlərinə görə, beynəlxalq təcrübədə tərbiyə müəssisələrindən çıxmış yeniyetmələrin hüquqlarının təminatı sahəsində müəyyən qayda və hüquqlar var. Bu baxımdan Azərbaycanda da nəzərdə tutulan xidmətlərdən biri yeniyetmələrin hüquqlarının qorunması ilə bağlıdır: "Düşünürəm ki, biz qanunvericilikdə müəyyən dəyişikliklər etsək, bu, mövcud problemlərin aradan qaldırılmasına öz töhfəsini verəcək".
Nazirlik rəsmisi uşaqların müdafiəsi ilə bağlı məsələlərin beynəlxalq təcrübə əsasında nəzərdən keçirildiyini vurğulayır: "İnkişaf etmiş ölkələrin təcrübəsini öyrənmişik və artıq müvafiq təcrübələr əldə etmişik. Amma bu o demək deyil ki, əldə etdiyimiz təcrübəni Azərbaycanda tətbiq etməliyik. Biz öz modelimizi, milli qanunvericilik bazamızı yaratmalıyıq".
|
