Azərbaycanda məhkəmələr icra hakimiyyətindən asılıdır, bundan da irəli gələrək, hakimlər qərarı ya aldıqları rüşvət, ya da siyasi sifariş əsasında çıxarırlar - bu sözləri Sülh və Demokratiya İnstitutunun (SDİ) rəhbəri L.Yunus dünən ölkə məhkəmələrindəki qanunsuzluqlarla bağlı Media Mərkəzində təşkil etdiyi mətbuat konfransında söylədi. SDİ rəhbəri Leyla Yunus 2007-2009-cu illər ərzində ölkədəki məhkəmə proseslərinin monitorinqini apardıqlarını, qanunsuzluqları üzə çıxardıqlarını və prosesləri qiymətləndirdiklərini bildirib. Tədbirdə jurnalistlərlə və əmlakın qanunsuz mənimsənilməsi ilə bağlı məhkəmə prosesləri diqqət mərkəzində olub. Eyni zamanda, SDİ rəhbəri L.Yunus Azərbaycanda hakimlərin qərarçıxarma "mexanizmi"ni də açıqladı.
SDİ rəhbəri hazırda jurnalistlər Qənimət Zahid, Eynulla Fətullayev, Müşfiq Hüseynov, bloqçular Adnan Hacızadə və Emin Millinin həbsdə olduqlarını deyərək, bu şəxslər barəsində çıxarılan məhkəmə qərarlarını ədalətsiz adlandırdı.
Eyni zamanda, SDİ rəhbəri son iki ildə vətəndaşların əmlaklarının əllərindən alınmasının geniş miqyas və kütləvi şəkil almasına diqqət çəkib. Əksər hallarda məhkəmələrin qanunsuz qərar çıxardığını deyən Leyla Yunus təsadüfən ədalətli qərar çıxarılanda həmin qərarın da daha yuxarı məhkəmə instansiyası tərəfindən ləğv edildiyini bildirdi.
"Vətəndaşların əmlakı ən çox "arxalı şirkətlər" tərəfindən mənimsənir və qanun bu şirkətlərə heç vaxt gücünü göstərə bilmir", - deyə vəkil Fuad Ağayev əmlak məsələlərilə bağlı məhkəmə proseslərinə toxununb. Onun sözlərinə görə, bu şirkətlər mənimsəmək istədikləri mənzil və binaların qəzalı olması barədə məhkəmələrdə iddiaçı kimi çıxış edir və sonra da həmin əmlaklara sahib olurlar. Vəkil əmlak sahiblərinə dəyərindən dəfələrlə aşağı kompensasiyalar təklif olunduğunu, razılaşma olmadıqda isə təzyiq, hədə-qorxu metodunun işə salındığını söyləyib.
Tədbirdə qanunsuz qərarlar çıxaran hakimlərə qarşı cəza məsələləri də diqqət mərkəzində olub. Ədalətsiz qərar çıxaran hakimlərə qarşı CM-in 295-ci maddəsinin tətbiqi məsələsi müzakirə edilsə də, bunun indiki halda mümkünsüz olduğu qənaəti daha çox vurğulandı.
Sonda ədalətsiz qərar çıxaran hakimlərin adları açıqlandı. Bu sırada Yasamal rayon Məhkəməsinin hakimləri İsa İsmayılov, Xaqani Tağıyev, Südabə Məmmədova, Səbail rayon Məhkəməsinin hakimləri Rauf Əhmədov, Famil Nəsibov, Nurəddin Bağırov, Elnur Həsənov, Araz Hüseynov, Əzizbəyov rayon Məhkəməsinin hakimləri Fatma Miriyeva, Rəşad Həsənov, Bakı Apellyasiya Məhkəməsinin hakimləri Həmid Həmidov, Abid Abdinbəyov, Rəsul Səfərov, Mirpaşa Hüseynov, Camal Ramazanov, Qail Məmmədov, Ali Məhkəmənin hakimləri Hacıbala Sadıqov və Şahin Yusifovun adları çəkildi.
|
